Fenomeni klimatik El Niño pritet të forcohet ndjeshëm gjatë muajve në vijim dhe të arrijë nivelin “shumë të fortë”, duke vazhduar me gjasë deri në shkurt të vitit të ardhshëm, ka paralajmëruar Organizata Botërore Meteorologjike (OKB).
Sipas agjencisë së Kombeve të Bashkuara, El Niño do të arrijë kulmin drejt fundit të këtij viti, ndërsa ndikimet e tij në temperaturat dhe reshjet mund të vazhdojnë edhe gjatë vitit 2027. Fenomeni mund të sjellë rritje të temperaturave, ndryshime të mëdha në reshje dhe rrezik më të lartë për përmbytje, thatësira dhe valë ekstreme të të nxehtit.
OKB vlerëson se mundësia që El Niño të vazhdojë deri në shkurt është pothuajse 100 për qind.
El Niño është një fenomen natyror klimatik që shkaktohet nga ngrohja e temperaturave të sipërfaqes së Oqeanit Paqësor, veçanërisht në pjesët qendrore dhe lindore të tij. Ai nuk shkaktohet nga ndryshimet klimatike, por shkencëtarët paralajmërojnë se mund të përforcojë temperaturat e larta në një planet që tashmë po ngrohet për shkak të emetimeve nga djegia e lëndëve djegëse fosile.
Sipas OKB-së, temperaturat e sipërfaqes së detit në zonën qendrore-lindore të Paqësorit kanë qenë deri në 2.2–2.6°C mbi normalen gjatë javëve të fundit të korrikut dhe mesit të gushtit. Në disa zona, temperaturat e ujërave nën sipërfaqe kanë qenë më shumë se 8°C mbi mesataren.
Fenomeni mund të ndikojë në motin në pjesë të ndryshme të botës, duke shkaktuar thatësira në disa rajone të Amazonës, Indonezisë dhe Australisë, si dhe ndryshime në reshjet sezonale në zona të tjera. OKB paralajmëron gjithashtu se gjatë muajve shtator–nëntor priten temperatura mbi normalen në pothuajse të gjitha zonat tokësore, shkruan Euronews.
The post OKB paralajmëron: El Niño pritet të jetë “shumë i fortë” dhe të zgjasë deri në shkurt appeared first on Gazeta Express.
