Deputeti i zgjedhur i Partisë Demokratike të Kosovës (PDK), Arben Mustafa, ka reaguar lidhur me veprimet e institucioneve ndaj qumështores “Vita”, duke i cilësuar ato si dëshmi të një qasjeje represive ndaj prodhuesve vendorë dhe sektorit privat.
Sipas Mustafës, ndërhyrjet ndaj kësaj kompanie po dërgojnë sinjal negativ për bizneset në Kosovë dhe rrezikojnë drejtpërdrejt klimën e investimeve në vend.
Represioni i sotëm ndaj qumështores Vita tregon luftën që kjo qeveri po e zhvillon kundër sektorit privat dhe prodhuesve vendorë!
Nuk mund të ketë as investime vendore e as investime të huaja në një vend ku qeveria është armiqësore ndaj sektorit privat.
Me këtë qasje, shihet qartë se qeveria e Albin Kurtit nuk synon zhvillimin ekonomik dhe krijimin e kushteve për një jetë me dinjitet në Kosovë.
Përkundrazi, po ndërton një model ekonomik ku qytetarët bëhen gjithnjë e më të varur nga ndihmat e qeverisë, në vend që të krijohen kushte për punë, prodhim dhe investime”, ka shkruar Mustafa.
