Ministri i Bujqësisë, Pylltarisë dhe Zhvillimit Rural, Armend Muja, ka angazhuar ekipet profesionale të institucioneve bujqësore për vlerësimin dhe trajtimin e dëmeve të shkaktuara nga breshëri në Komunën e Istogut.
Sipas njoftimit të Ministrisë së Bujqësisë, ekipet e Institutit Bujqësor të Kosovës (IBK) dhe Departamentit të Shërbimeve Këshilluese dhe Teknike (DSHKT), në bashkëpunim me Drejtorinë Komunale për Bujqësi në Istog, kanë dalë në terren për të evidentuar dëmet, për të përcaktuar nevojat për ndërhyrje urgjente dhe për të dhënë rekomandime profesionale për rikuperimin e prodhimit bujqësor.
“Me kërkesë të ministrit të Bujqësisë, Pylltarisë dhe Zhvillimit Rural, Armend Muja, ekipet profesionale kanë vazhduar punën në terren për të vlerësuar dëmet e shkaktuara nga breshëri dhe masat që duhet të ndërmerren për ruajtjen dhe rikuperimin e prodhimit bujqësor”, thuhet në njoftim.
Vlerësimet janë fokusuar në kulturat shumëvjeçare, si dhe në përcaktimin e nevojave për rimbjelljen e kulturave të dëmtuara. Sipas ekspertëve, ndërhyrjet agronomike dhe fitosanitare menjëherë pas breshërit janë të rëndësishme për të parandaluar përhapjen e sëmundjeve dhe për të rritur mundësinë e rikuperimit të prodhimit.
Ministria ka bërë të ditur se rekomandimet profesionale do t’u përcillen fermerëve pas përfundimit të vlerësimeve në terren.
Ndërkohë, ministri Muja ka themeluar edhe Shtabin për Menaxhimin e Situatës, i cili po koordinon veprimet mes institucioneve qendrore dhe lokale për përballimin e pasojave nga dëmet e shkaktuara.
Në kuadër të masave afatgjata, Ministria e Bujqësisë ka njoftuar se po përgatit një program për rikuperimin e prodhimit bujqësor dhe rritjen e qëndrueshmërisë së fermerëve ndaj fatkeqësive natyrore, përfshirë sigurimet bujqësore, investimet në rrjeta mbrojtëse kundër breshrit dhe forcimin e shërbimeve këshilluese në terren.
