Kuvendi Komunal i Prishtinës e ka miratuar buxhetin për vitin 2027. Buxheti kap vlerën e më shumë se 161 milionë eurove. E një prej projekteve, në vlerë mbi 7 milionë euro, parasheh zgjatjen e sheshit “Xhorxh Bush” deri te Posta.
Kryetari Përparim Rama ka thënë se nga shuma totale, 58 milionë euro janë për investime kapitale e 22 milionë euro janë nga Ligji për Kryeqytetin.
“Mjetet e qytetarëve do t’i kthejmë në çerdhe, shkolla, sport, shëndetësi e kulturë dhe përgatitjet për Prishtina 2030. Për buxhetin mund të ketë debat, por duhet të ketë vendim. Të mos mbetemi peng i dallimeve politike. Nuk votojmë për pushtetin, po për qytetarin. Kërkoj votën tuaj që të vazhdojmë punën. Kemi përgjegjësinë ndaj atyre që na kanë zgjedhur. Të bëhemi bashkë për një Prishtinë më të mirë”, ka thënë Rama në fjalimin e tij.
Kundër dolën asamblistët e Vetëvendosjes. Gëzim Sveçla, kryetar i asamblistëve të VV-së, ka thënë se “buxheti nuk është për qytetarin, por pak për LDK-në dhe pak për PDK-në”.
“Buxhet që iu shërben grupeve të caktuara. Vetëvendosje nuk ka votë për një buxhet të tillë”, ka thënë ai.
Ndërkaq LDK-ja dhe PDK-ja e mbështetën buxhetin.
Asamblisti i LDK-së, Egzon Pacolli, ka thënë se me këtë buxhet “ndihmohen punët që ndikojnë në një jetë më të mirë”. Ai ka veçuar projektet për memorialët “Ibrahim Rugova” e “Adem Jashari”.
E Plator Gërdovci nga PDK-ja ka thënë se e vlerësojnë orientimin e mjeteve drejt transportit publik, teksa ka thënë se sfida kryesore mbete realizimi i projekteve të miratuara.
“Presim që punët të bëhen me kohë”, ka thënë ai.
Buxheti u miratua me 31 vota për. 12 ishin kundër.
The post Miratohet buxheti i Prishtinës për 2027, parashihet zgjatja e sheshit deri te Posta appeared first on Gazeta Express.
