Manchester United po përgatitet ta bëjë një lëvizje të fuqishme në orët e fundit të afatit kalimtar të verës, me synimin për ta transferuar yllin e Real Madridit, Eduardo Camavinga.
Sipas radios spanjolle “Cadena SER“, përmes emisionit “El Larguero”, Manchester United e ka vendosur mesfushorin francez ndër objektivat kryesorë të këtyre ditëve, përcjell “Gazeta Express”.
Klubi anglez po planifikon ta paraqesë një ofertë zyrtare përpara mbylljes së afatit kalimtar.
Sipas raportimit, “Djajtë e Kuq” janë gati t’i ofrojnë 50 milionë euro për Camavingan, me ofertën që pritet të bëhet në ditët e fundit të afatit kalimtar të verës.
Klubi anglez dëshiron ta përforcojë mesfushën dhe e sheh Camavingan si një futbollist që mund t’i japë skuadrës më shumë forcë dhe fleksibilitet, falë aftësisë së tij për të luajtur në më shumë se një pozicion.
Strategjia e Manchester United është të presë deri në fazën finale të “merkatos” përpara se ta paraqesë ofertën zyrtare, me shpresën për ta mbyllur shpejt marrëveshjen.
Camavinga është nën kontratë me Real Madridin, klub të cilit iu bashkua nga Rennes.
Gjatë viteve të fundit, francezi është shndërruar në një prej futbollistëve të rëndësishëm të skuadrës, pavarësisht konkurrencës së madhe në mesfushën e “Los Blancos”. /Gazeta Express
The post Man Utd e hap kuletën për yllin e Realit appeared first on Gazeta Express.
