Presidenti i Francës, Emmanuel Macron, ka premtuar mbështetje të plotë shtetërore për rindërtimin dhe rikuperimin e zonave të goditura nga zjarret shkatërruese që kanë përfshirë jugperëndimin e vendit, veçanërisht rajonet Gironde dhe Landes.
Përmes një postimi në rrjetet sociale, Macron deklaroi se autoritetet do të vazhdojnë të jenë të pranishme në terren për aq kohë sa të jetë e nevojshme, ndërsa vlerësoi solidaritetin e qytetarëve dhe punën e ekipeve të emergjencës.
“Në këto orë kur flakët po e vënë në provë vendin tonë, Franca po tregon se është një popull i bashkuar që mbështet njëri-tjetrin”, shkroi presidenti francez.
Dans ces heures où les flammes éprouvent durement notre pays, la France révèle ce qu’elle est : un peuple uni, qui se serre les coudes.
Merci à nos sapeurs-pompiers, à nos militaires, aux forces de sécurité civile, à nos gendarmes et policiers, ainsi qu’aux agriculteurs… pic.twitter.com/DFzPt8vSYM
— Emmanuel Macron (@EmmanuelMacron) July 25, 2026
Zjarret kanë detyruar autoritetet të evakuojnë rreth 200 mijë persona nga banesat, kampingjet dhe objektet turistike në zonat e rrezikuara, ndërsa operacionet e shpëtimit dhe të shuarjes së flakëve vazhdojnë.
Ministri i Brendshëm, Laurent Nunez, bëri të ditur se vatra kryesore e zjarrit ndodhet rreth 30 kilometra nga Bordoja, duke shtuar se janë vendosur kufizime në qarkullimin rrugor dhe hekurudhor për të lehtësuar operacionet e emergjencës. Aeroporti i Bordosë mbetet funksional, megjithëse transporti publik është prekur nga situata.
Mes të evakuuarve është edhe 71-vjeçarja Bernadette, e cila tregoi se u largua gjatë natës vetëm me dy nipërit e saj të vegjël, duke lënë pas ilaçet dhe sendet personale. Ajo është strehuar në një qendër pritjeje në Bordo, e përshtatur për banorët e zhvendosur nga zjarret.
Ndërkohë, autoritetet franceze kanë lejuar kthimin e rreth 3 mijë banorëve në disa zona të stabilizuara të rajonit Gironde, përfshirë qytetin Biscarrosse. Megjithatë, zjarret ende nuk janë vënë plotësisht nën kontroll.
Situata mbetet shqetësuese edhe në Spanjë, ku mijëra banorë janë evakuuar nga zonat pranë Madridit dhe Ávilës për shkak të përhapjes së zjarreve të mëdha pyjore.
