Partia më e madhe serbe në Kosovë, Lista Serbe, ka dorëzuar ankesë në Gjykatën Kushtetuese, duke kundërshtuar vendimin e Gjykatës Supreme lidhur me ndarjen e ulëses së 10-të të garantuar për komunitetin serb në Kuvendin e Kosovës.
Në zgjedhjet parlamentare të 7 qershorit, Lista Serbe fitoi nëntë ulëse, ndërsa ulësja e dhjetë iu takua partisë ZSPO, të udhëhequr nga Nenad Rashiq.
Lista Serbe pretendon se Rashiq ka siguruar vota kryesisht në zona ku, sipas saj, jetojnë pak ose aspak serbë, duke kërkuar anulimin e atyre votave. Megjithatë, kjo kërkesë u refuzua nga institucionet përgjegjëse, përfshirë edhe Gjykatën Supreme.
Sipas Listës Serbe, me këtë vendim i është mohuar komunitetit serb ulësja e garantuar me Kushtetutë. Në ankesën drejtuar Gjykatës Kushtetuese, partia pretendon se Komisioni Qendror i Zgjedhjeve, Paneli Zgjedhor për Ankesa dhe Parashtresa, si dhe Gjykata Supreme, nuk kanë zbatuar siç duhet qëllimin kushtetues të vendeve të rezervuara për komunitetin serb.
Nga ana tjetër, Gjykata Supreme ka vlerësuar se pretendimet e Listës Serbe nuk janë mbështetur me prova që dëshmojnë manipulim të votave, duke theksuar në vendimin e saj se votimi është i lirë dhe i fshehtë.
“Gjykatës Kushtetuese iu propozua që për herë të parë të ofrojë një interpretim të qartë kushtetues të përmbajtjes së kësaj garancie dhe të përcaktojë nëse mënyra ekzistuese e zbatimit të legjislacionit zgjedhor siguron qëllimin e tij të vërtetë apo e bën atë vetëm një institut formal pa mbrojtje efektive”, thuhet në reagimin e kësaj partie, siç transmeton Kossev.
“Nëse do të pranohej që përfaqësuesit politikë të një komuniteti mund të zgjidhen në mënyrë vendimtare nga anëtarët e komuniteteve të tjera, atëherë vetë qëllimi i vendeve të rezervuara parlamentare do të vihej në pikëpyetje, jo vetëm për komunitetin serb, por edhe për të gjitha komunitetet e tjera jo-shumicë të cilave Kushtetuta u garanton përfaqësim të veçantë politik”.
Sipas Kushtetutës së Kosovës, Kuvendi i ka 120 ulëse. 20 prej tyre janë të garantuara për përfaqësim të komuniteteve (10 për komunitetin serb dhe 10 për komunitetet tjera).
The post Lista Serbe i drejtohet Kushtetueses për ulësen e 10-të në Kuvend appeared first on Gazeta Express.
