Shërbimi Sekret i Shteteve të Bashkuara ka arrestuar një burrë pranë Shtëpisë së Bardhë, i cili dyshohet se kishte kërcënuar se do ta vriste presidentin amerikan, Donald Trump.

Sipas një deklarate të Departamentit amerikan të Sigurisë Kombëtare (DHS), oficerët e vunë re të dyshuarin duke u sjellë në mënyrë të dyshimtë brenda një veture të parkuar në Constitution Avenue, në Washington.

Kur oficerët iu afruan, ai dyshohet se u kishte thënë se kishte “dëgjuar zëra në kokë” që i thoshin ta vriste Trumpin.

Autoritetet më pas konstatuan se automjeti ishte raportuar si i vjedhur, ndërsa i dyshuari pranoi se kishte armë brenda tij.

“Pas kontrollit të automjetit, oficerët gjetën tri armë të ndryshme zjarri, përfshirë një pushkë, si dhe dhjetëra fishekë municioni. Më pas, i dyshuari u arrestua”, thuhet në deklaratën e DHS-së.

I arrestuari është identifikuar si Ronny Yordrix Guanipa Chrinos, shtetas i Venezuelës.

Sipas Departamentit të Sigurisë Kombëtare, Chrinos është akuzuar për disa vepra penale, përfshirë posedimin e armëve të rrezikshme dhe vjedhjen.

Aktualisht ai ndodhet nën kujdesin e Shërbimit të Marshalëve të SHBA-së.

DHS pretendon gjithashtu se Chrinos kishte hyrë ilegalisht në Shtetet e Bashkuara përmes Teksasit në mars të vitit 2024.

Rasti vjen në një periudhë kur autoritetet amerikane kanë raportuar një numër të rasteve të kërcënimeve ndaj Trumpit pas rikthimit të tij në Shtëpinë e Bardhë në janar të vitit 2025.

Drejtori i Shërbimit Sekret, Sean Curran, tha se incidenti pasqyron nivelin e lartë të kërcënimeve me të cilat përballen autoritetet përgjegjëse për sigurinë e presidentit.

“Ky incident pasqyron mjedisin e shtuar të kërcënimeve në të cilin operojmë, si dhe numrin e vazhdueshëm të individëve të armatosur që tërhiqen drejt kompleksit të Shtëpisë së Bardhë”, deklaroi Curran.

Ai shtoi se personeli i Shërbimit Sekret është i trajnuar për t’iu përgjigjur situatave të tilla, por autoritetet janë të shqetësuara për rritjen e rasteve që përfshijnë kërcënime.

Markwayne Mullin, sekretari i Sigurisë Kombëtare, falënderoi oficerët e Shërbimit Sekret për ndërhyrjen.

“Falë oficerëve tanë të guximshëm të Shërbimit Sekret, ky person, i cili kishte tri armë zjarri në automjetin e tij, u arrestua pranë Shtëpisë së Bardhë para se të mund të lëndonte dikë”, tha ai. /Telegrafi/