Trajneri i Kombëtares shqiptare, Rolando Maran, ka bërë publike listën me 27 futbollistët e grumbulluar për dy ndeshjet e fundit të Grupit C1 në UEFA Nations League, ndaj Finlandës dhe Bjellorusisë.

Risia e vetme në listën e kuqezinjve është mbrojtësi i Dinamo City, Ysni Ismaili, i cili merr për herë të parë ftesën për të qenë pjesë e Kombëtares shqiptare.

Një mundësi e rëndësishme për futbollistin, i cili tashmë do të ketë rastin të tregojë vlerat e tij në përfaqësuesen kuqezi.

Shqipëria do ta nisë këtë edicion të ndeshjeve të nëntorit me përballjen ndaj Finlandës, e cila do të zhvillohet më 12 nëntor, në stadiumin “Air Albania”, duke filluar nga ora 20:45.

Ndërkohë, sfida e dytë do të luhet më 15 nëntor në Budapest të Hungarisë, ku kuqezinjtë do të përballen me Bjellorusinë në stadiumin “Illovszky Rudolf”, me fillim nga ora 18:00. Këto dy përballje do të jenë vendimtare për Shqipërinë në mbyllje të fazës së grupeve të UEFA Nations League, ndërsa vëmendja do të jetë edhe te debutuesi i mundshëm, Ysni Ismaili.

Burimi: Dukagjini