Kryetari i Komunës së Deçanit, Bashkim Ramosaj, ka njoftuar se kanë filluar punimet për përfundimin e objektit të ri të shkollës “Faik Konica” në Ratishë, pas një procesi të gjatë dhe vonesave disavjeçare.

Përmes një postimi, Ramosaj ka bërë të ditur se projekti kishte nisur në nëntor të vitit 2019, me një kontratë trevjeçare, por për shkak të dështimit të punëkryesve dhe procedurave të zhvilluara nga Ministria e Arsimit, përfundimi i tij ishte vonuar për disa vite.

Sipas tij, tashmë është zhvilluar një tender i ri, ndërsa afati për përfundimin e punimeve është 14 muaj.

“Me tenderin e ri dhe afatin prej 14 muajsh, po vazhdohet drejt përfundimit të objektit, në mënyrë që nxënësit dhe mësimdhënësit të kenë kushte moderne dhe dinjitoze për zhvillimin e procesit mësimor”, ka shkruar Ramosaj.

Ai ka bërë të ditur se shkolla e re do të ketë infrastrukturë bashkëkohore, hapësira të gjelbra, kënd të lojërave dhe ambiente të përshtatshme për mësim, argëtim dhe zhvillim të fëmijëve.

Me përfundimin e projektit, sipas Ramosajt, do të largohet edhe objekti i vjetër shkollor, duke i hapur rrugë krijimit të një hapësire tërësisht të re shkollore. /Telegrafi/