Presidenti rus, Vladimir Putin, ka konfirmuar se raundi i ardhshëm i bisedimeve trepalëshe ndërmjet Rusisë, Shteteve të Bashkuara të Amerikës dhe Ukrainës do të nisë të martën e ardhshme në Abu Dhabi të Emirateve të Bashkuara Arabe.

Siç raportojnë mediat ndërkombëtare, lajmi është bërë i ditur gjatë një takimi të zhvilluar me anëtarët e përhershëm të Këshillit të Sigurimit të Rusisë, ku Putin mblodhi përfaqësuesit e delegacionit rus që do të udhëtojnë drejt kryeqytetit të Emirateve për të marrë pjesë në këto negociata diplomatike.

“Duke qenë se negociatat pritet të zhvillohen të martën, i ftova kolegët që do të marrin pjesë në këtë raund bisedimesh,” është shprehur kreu i Kremlinit gjatë takimit përgatitës.

Në këtë mbledhje me presidentin rus kanë marrë pjesë zyrtarët e lartë shtetërorë Vladimir Medinsky, Igor Kostyukov, Yuri Ushakov, Mikhail Galuzin dhe Sergei Ryabkov, të cilët pritet të përbëjnë bërthamën e ekipit negociator të Moskovit.

Fokusi kryesor i takimit trepalësh në Abu Dhabi pritet të jetë diskutimi i hollësishëm mbi garancitë e sigurisë, uljen e tensioneve ushtarake në terren, si dhe trajtimi i çështjeve humanitare. Ndër të tjera, palët pritet të shqyrtojnë hapa konkretë që mund të çojnë drejt një zgjidhjeje të mundshme paqësore për konfliktin.

Burimi: Sinjali