Gjermania po përballet me një javë tipike vjeshtore, me temperatura të ulëta, mjegull, ngrica gjatë natës dhe intervale me diell.

Sipas parashikimit të publikuar nga gazeta gjermane Bild, ditët në vijim do të karakterizohen nga mot i ndryshueshëm, ndërsa në disa rajone temperaturat do të zbresin nën zero.

Meteorologët parashikojnë se fillimi i javës do të jetë kryesisht i vranët, veçanërisht në veriperëndim të vendit, ku priten edhe reshje të lehta shiu.

Në juglindje do të ketë intervale me kthjellime, ndërsa temperaturat maksimale do të lëvizin nga 4 deri në 12 gradë Celsius, transmeton Telegrafi.

Nga e marta, ndikimi i një zone të fuqishme anticiklonike do të bëhet më i ndjeshëm, duke kufizuar reshjet në pjesën më të madhe të vendit. Megjithatë, kjo nuk do të thotë se moti do të jetë i kthjellët kudo.

Në lugina dhe zona të ulëta pritet të krijohet mjegull e dendur dhe vranësira të ulëta, të cilat në disa vende mund të qëndrojnë gjatë gjithë ditës.

Mundësitë më të mira për mot me diell do të jenë në perëndim dhe jugperëndim të Gjermanisë, si dhe në zonat malore të jugut. Në veri dhe lindje, ndërkohë, do të mbizotërojnë më shpesh vranësirat dhe mjegulla.

Sipas meteorologut Markus Eifried nga Shërbimi Gjerman i Motit (DËD), dita më e bukur e kësaj jave pritet të jetë e enjtja, kur në shumë pjesë të vendit do të ketë më shumë intervale me diell. Temperaturat nga e marta deri të premten pritet të lëvizin kryesisht nga 4 deri në 11 gradë Celsius.

Një tjetër shqetësim do të jenë temperaturat gjatë natës. Në zonat ku qielli do të jetë i kthjellët, termometrat mund të zbresin nga 0 deri në minus 2 gradë, ndërsa në disa zona të mbrojtura mund të arrijnë deri në minus 3 gradë Celsius.

Meteorologët paralajmërojnë edhe drejtuesit e automjeteve për rrezikun e ngricave në mëngjes, xhamat e ngrirë dhe dukshmërinë e kufizuar për shkak të mjegullës. Për këtë arsye, rekomandohet kujdes i shtuar në trafik.

Edhe pse në fundjavë janë regjistruar reshje bore në Alpet bavareze dhe në malet Fichtelberg, ekspertët nuk parashikojnë për momentin një depërtim të fuqishëm dimëror në të gjithë Gjermaninë.

Megjithatë, vëmendja e meteorologëve është përqendruar te datat 10 dhe 11 nëntor, kur mund të krijohen kushte për depërtimin e masave dukshëm më të ftohta ajrore. Ende nuk është e qartë nëse kjo situatë do të sjellë një ndryshim të madh të motit apo reshje të reja bore në vend./Telegrafi/