Një gjobë prej 200 eurosh, e mbetur e papaguar, i ka kushtuar me 10 ditë burg një 47-vjeçari, i cili është ndaluar nga Policia në pikën kufitare në Han të Elezit, në bazë të një urdhërarresti të lëshuar nga Gjykata Themelore në Prishtinë, raporton Gazeta Sinjali.

Sipas burimeve të Sinjalit, bëhet fjalë për Bedri Ramën, 47 vjeçar, i cili është ndaluar në orët e para të së hënës, më 16 nëntor, pak pas mesnatës.
Gjatë verifikimit në pikën kufitare, autoritetet kanë konstatuar se ndaj tij ishte aktiv një urdhërarrest i Gjykatës Themelore në Prishtinë, lidhur me veprën penale “Lëndimi i lehtë trupor”.
Shkak për ekzekutimin e urdhërarrestit ishte mospagesa e gjobës prej 200 eurosh, e cila ishte zëvendësuar me dënim me burgim prej 10 ditësh.
Pas ndalimit, Policia ka zbatuar urdhëresën gjyqësore dhe e ka dërguar 47-vjeçarin në institucionin korrektues për vuajtjen e dënimit.
Kështu, gjoba e papaguar prej 200 eurosh ka rezultuar me privimin e tij nga liria për 10 ditë, në përputhje me vendimin gjyqësor.
Personat e arrestuar konsiderohen të pafajshëm derisa fajësia e tyre të vërtetohet me vendim gjyqësor të formës së prerë.
Sinjali – aty ku e vërteta flet para lajmit!
Burimi: Sinjali





