Tash e një javë po vazhdojnë protestat pas vrasjes së Arlinda Zekajt në Pejë, me qytetarë dhe aktivistë që po kërkojnë drejtësi për viktimën dhe përgjegjësi institucionale për dështimet që i paraprinë tragjedisë.
Protestuesit kërkojnë që vrasja e grave të trajtohet si çështje urgjente kombëtare, ndërsa kanë kërkuar edhe ndjekje penale të prokurorëve dhe gjyqtarëve që janë marrë me rastin e Arlindës.
Në mesin e kërkesave të tyre është edhe shkarkimi i ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla, pasi të dy refuzuan të japin dorëheqje. Dorëheqja i është kërkuar edhe kryetarit të Pejës, Gazmend Muhaxheri.
Arlinda Zekaj u vra më 25 tetor në Vitomiricë të Pejës, nga ish-kunati i saj. Vrasja ndodhi vetëm pak ditë pasi ajo kishte paralajmëruar me letër institucionet se jeta e saj ishte në rrezik.
Ajo ishte kthyer nga Policia, ku kishte paraqitur ish-bashkëshortin për kanosje, kur ndodhi vrasja.
Rasti ka nxitur reagime të shumta publike, protesta dhe zhvillime në institucionet e sigurisë dhe drejtësisë. Ndër masat e ndërmarra pas ngjarjes janë dorëheqja e drejtorit të Përgjithshëm të Policisë së Kosovës, Gazmend Hoxha, si dhe suspendimi i zyrtarëve policorë dhe prokurorëve.
Sinjali – aty ku e vërteta flet para lajmit!
Burimi: Sinjali
