Mbyllja e institucioneve paralele serbe në Kosovë dhe marrëveshjet e arritura në kuadër të dialogut me Prishtinën kanë nxitur përplasje të reja politike në Serbi, ku presidenti Aleksandar Vuçiq është përballur me akuza nga deputetë të Listës Studentore dhe përfaqësues të organizatave serbe nga Kosova.

Gjatë një seance të Kuvendit të Serbisë, deputeti Feda Dimoviq e akuzoi Vuçiqin dhe përfaqësues të ish-pushtetit serb se kanë dorëzuar institucionet e Serbisë në Kosovë përmes Marrëveshjes së Brukselit të vitit 2013.
Dimoviq, anëtar i grupit muzikor “Sindikata e Beogradit”, reagoi ndaj pretendimeve se ai është pjesë e një “sindikate të Brukselit”, duke rikujtuar se marrëveshjen e kishte nënshkruar ish-kryeministri serb Ivica Daçiq.
Në përgjigje, Vuçiq mohoi se ishte nënshkrues i marrëveshjes, duke deklaruar: “Marrëveshjen e Brukselit e ka nënshkruar Ivica Daçiq, jo unë”.
Përplasjet politike në Beograd janë intensifikuar edhe pas mbylljes së disa institucioneve paralele serbe në Kosovë. Autoritetet kosovare kanë ndërmarrë aksione të njëpasnjëshme që nga viti 2024, me qëllim të shtrirjes së rendit juridik dhe institucional në të gjithë territorin e vendit.
Ndërkohë, më 16 nëntor, përfaqësues të tri organizatave serbe nga Kosova kanë dorëzuar në Prokurorinë e Lartë Publike në Beograd një kallëzim penal ndaj Vuçiqit dhe disa ish-zyrtarëve të tjerë serbë, përfshirë Ivica Daçiqin, Ana Brnabiqin, Petar Petkoviqin dhe Goran Rakiqin.
Ata pretendojnë se vendimet dhe marrëveshjet e arritura nga ish-pushteti serb në kuadër të dialogut me Kosovën kanë dëmtuar interesat shtetërore dhe kombëtare të Serbisë. Për këtë arsye, kanë kërkuar hetimin dhe rishqyrtimin e Marrëveshjes së Brukselit, Marrëveshjes së Uashingtonit, Marrëveshjes së Ohrit dhe Planit franko-gjerman.
Në kallëzim janë përfshirë edhe kërkesa për hetimin e integrimit të policisë dhe gjyqësorit në sistemin e Kosovës, rolit të Listës Serbe dhe pretendimeve për presione ndaj qytetarëve serbë gjatë proceseve zgjedhore.
Një pjesë e veçantë e dokumentit u kushtohet edhe dy ngjarjeve të rënda: vrasjes së politikanit serb Oliver Ivanoviq në vitin 2018 dhe sulmit të armatosur në Banjskë, në shtator të vitit 2023, ku u vra rreshteri i Policisë së Kosovës, Afrim Bunjaku.
Përfaqësuesit e organizatave kanë kërkuar që të hetohen lidhjet e mundshme të personave të përmendur në kallëzim me vrasjen e Ivanoviqit, si dhe rrjedhat financiare dhe komunikimet që mund të hedhin dritë mbi përgatitjen e sulmit në Banjskë.
Kallëzimi përmban pretendime dhe kërkesa për hetim, të cilat mbeten për t’u vlerësuar nga organet kompetente të drejtësisë në Serbi.
Zhvillimet e fundit tregojnë se çështja e Kosovës, marrëveshjet e dialogut dhe përgjegjësia e ish-pushtetit serb po shkaktojnë debat të ri politik brenda vetë Serbisë.
Sinjali – aty ku e vërteta flet para lajmit!
Burimi: Sinjali





