Gjykata Themelore në Gjilan ka caktuar nga një muaj paraburgim ndaj katër të miturve, të cilët dyshohen për vrasje në tentativë. Vendimi u mor më 13 nëntor, pas kërkesës së Prokurorisë Themelore në Gjilan, raporton Gazeta Sinjali.
Sipas kërkesës së Prokurorisë, ngjarja ndodhi më 11 nëntor, rreth orës 10:25, në rrugën “Mësuesit e viteve të 90-ta” në Gjilan. Prokuroria pretendon se të miturit i goditën dy të dëmtuarit pas një mosmarrëveshjeje të mëhershme mes njërit prej të dyshuarve dhe njërit prej të dëmtuarve.
Njëri nga të miturit dyshohet se e goditi me thikë njërin të dëmtuar në kraharor, ndërsa tjetrin dy herë në shpinë. Të dy morën ndihmë mjekësore në Emergjencën e Spitalit të Përgjithshëm të Gjilanit. I dëmtuari që u godit në shpinë u transferua në QKUK për shkak të gjendjes së rënduar shëndetësore.
Sipas Prokurorisë, dy nga të miturit u larguan nga vendi i ngjarjes.
Gjyqtari i procedurës paraprake në Departamentin për të Mitur vlerësoi se janë plotësuar kushtet ligjore për paraburgim dhe se masat më të lehta do të ishin të pamjaftueshme për zhvillimin e procedurës penale.
Palët kanë të drejtë të ankohen ndaj vendimit në Gjykatën e Apelit.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali
