Kombëtarja e Kosovës ka përfunduar përgatitjet për ndeshjen e radhës ndaj Izraelit, e cila zhvillohet nesër në stadiumin “Fadil Vokrri”, në kuadër të Ligës së Kombeve.

Federata e Futbollit e Kosovës (FFK) ka bërë të ditur se Dardanët kanë zhvilluar sot stërvitjen e fundit para kësaj përballjeje, me përzgjedhësin Franco Foda që ka shfrytëzuar seancën për të punuar në detajet e fundit taktike dhe për të përgatitur skuadrën për sfidën e rëndësishme.

Atmosfera në kampin e Kosovës është shumë e mirë, ndërsa futbollistët janë të motivuar dhe të përqendruar maksimalisht për ta dhënë më të mirën në këtë ndeshje.

Tashmë, gjithçka është gati për përballjen e nesërme, ku Kosova do të kërkojë mbështetjen e tifozëve në stadiumin “Fadil Vokrri”, në një sfidë të rëndësishme për objektivat e saj në Ligën e Kombeve.

Dardanët synojnë të shfrytëzojnë përparësinë e fushës vendase dhe përkrahjen e tifozëve për të arritur një rezultat pozitiv ndaj Izraelit.

Kujtojmë se ndeshja do të nis me fillim nga ora 15:00, ndërsa tri ditë më vonë (e martë) Kosova do të luajë në transfertë ndaj Irlandës në Dublin./Telegrafi/