Është konfirmuar raportimi ekskluziv i Sinjalit lidhur me incidentin e ndodhur në Qendrën Korrektuese në Dubravë, ku u përfshinë disa të burgosur, të cilët dyshohet se e sulmuan fizikisht Endrit Gashin.
Zëdhënësi i policisë për rajonin e Pejës Sheremet Elezaj, ka deklaruar për Sinjalit se ngjarja ka ndodhur dje, më datë 06.11.2026, rreth orës 17:20, ku katër të burgosur janë përfshirë në një përleshje fizike.
“Me të vërejtur incidentin, me kohë ka ndërhyrë personeli i qendrës korrektuese, i cili ka arritur ta vërë situatën nën kontroll.Në vendin e ngjarjes kanë dalë edhe njësitë përkatëse policore për të ndërmarrë veprimet e nevojshme meqë rasti ka ndodhur brenda hapësirave të burgut. Pas konsultimit me Prokurorin e Shtetit, ndaj personave të përfshirë është iniciuar rasti “Lëndim i lehtë trupor”. Hetimet lidhur me rrethanat dhe shkaqet e plota të kësaj përleshjeje janë ende duke vazhduar nga organet e rendit”, tha Elezaj për Sinjalin.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata
Sinjali – aty ku e vërteta flet para lajmit!
Burimi: Sinjali
