Korporata Energjetike e Kosovës (KEK), ka reaguar ndaj deklarimeve dhe kritikave politike lidhur me investimet në Termocentralin Kosova B, duke thënë se projektet strategjike duhet të vlerësohen mbi bazën e fakteve dhe jo të përdoren për përplasje politike.

Në reagimin e saj, KEK-u ka sqaruar se projekti për reduktimin e emetimeve të pluhurit dhe oksideve të azotit (ESP/DeNOx) në njësitë B1 dhe B2 financohet nga Bashkimi Evropian përmes fondeve IPA, ndërsa ky i fundit është edhe autoriteti kontraktues dhe përgjegjës për menaxhimin e kontratës. KEK-u, sipas reagimit, është përfitues i këtij investimi.

Korporata ka bërë të ditur se punimet në njësinë B1 kanë nisur më 10 prill 2026, ndërsa afati kontraktual për ndezjen e kaldajës për prodhimin e avullit është 25 nëntori 2026.

Sipas KEK-ut, fillimi i projektit ishte shtyrë për shkak të pandemisë COVID-19, projektit të dilatimeve, falimentimit të njërit prej anëtarëve të konsorciumit kontraktues dhe rrethanave të tjera që kanë ndikuar në realizimin e tij.

Ndërkaq, KEK-u ka sqaruar se projekti për modernizimin e turbinave është investim i vetë Korporatës, e cila është përgjegjëse për financimin, kontraktimin dhe menaxhimin e tij.

Punimet për modernizimin e turbinave dhe komisionimi i ftohtë në njësinë B1, sipas KEK-ut, kanë përfunduar më 2 nëntor 2026. Testimet përfundimtare dhe komisionimi në kushte operimi do të bëhen pas përfundimit të projektit mjedisor dhe rikthimit të njësisë në funksion.

KEK-u ka theksuar se bëhet fjalë për dy projekte të ndara, me burime të ndryshme financimi dhe përgjegjësi të veçanta institucionale, të cilat nuk duhet të paraqiten si një investim i vetëm i Korporatës.

Në reagim thuhet gjithashtu se KEK-u është duke realizuar programin më të madh të modernizimit teknologjik që nga ndërtimi i njësive prodhuese, me investime të planifikuara në vlerë prej mbi 500 milionë eurosh.

Sa u përket ndërprerjeve të energjisë elektrike, KEK-u ka theksuar se është prodhues i energjisë dhe që nga viti 2013 nuk është më operator i rrjetit të shpërndarjes. Për këtë arsye, sipas Korporatës, ndërprerjet që shkaktohen nga defektet apo punimet në rrjetin e shpërndarjes nuk mund t’i atribuohen asaj.

“Prandaj, krahas respektimit të afateve, rëndësi thelbësore kanë cilësia e punimeve, siguria teknike, përmbushja e standardeve mjedisore dhe qëndrueshmëria afatgjatë e investimeve. KEK-u nuk është dhe nuk duhet të bëhet arenë e përplasjeve politike. Investimet strategjike duhet të vlerësohen mbi bazën e fakteve, rezultateve dhe përgjegjësive reale institucionale, jo të përdoren si instrument për interesa politike”, thuhet nga KEK-u.

KEK-u ka bërë thirrje që investimet strategjike të trajtohen me profesionalizëm dhe transparencë, duke kërkuar që përgjegjësitë institucionale të dallohen qartë dhe procesi i modernizimit të mos politizohet.

Burimi: Dukagjini