Komuna e Gjakovës është pranuar zyrtarisht si anëtare e re e Ligës së Qyteteve Historike, në kuadër të Konferencës së 20-të Botërore të Qyteteve Historike, e cila u mbajt në Himeji të Japonisë.
Lajmin e ka bërë të ditur kryetari i Gjakovës, Ardian Gjini, i cili ka treguar se gjatë konferencës ka prezantuar historinë dhe trashëgiminë kulturore të qytetit, si dhe gatishmërinë për bashkëpunim me qytetet e tjera anëtare.
Sipas tij, takimet me kryetarë të qyteteve japoneze dhe përfaqësues të vendeve të tjera krijojnë mundësi për shkëmbim përvojash dhe zhvillimin e projekteve konkrete në fushën e kulturës, turizmit dhe zhvillimit ekonomik.
Gjini ka vlerësuar se kjo pjesëmarrje përbën edhe një kontribut të rëndësishëm për prezencën e Kosovës në mekanizmat ndërkombëtarë.
Vizita zyrtare është përmbyllur në Kyoto, ku në një darkë të organizuar nga kryetari i këtij qyteti, Gjini ka mbajtur fjalën përmbyllëse.
Ai ka falënderuar organizatorët për mikpritjen, si dhe Ambasadën e Kosovës në Tokio, veçanërisht zëvendësshefin e misionit, Arbër Mehmeti, për mbështetjen dhe bashkëpunimin gjatë kësaj vizite.
Sinjali – aty ku e vërteta flet para lajmit!
Burimi: Sinjali
