Ish-kapiteni i Liverpoolit ka përmendur në veçanti titullin e Premier League-s të vitit 2014, kur Manchester City triumfoi në garën për kampionatin anglez përpara skuadrës së tij.

Megjithatë, Manchester City i ka mohuar vazhdimisht akuzat dhe e ka kundërshtuar çështjen përmes procedurave ligjore. Gerrard ka shprehur keqardhje për lojtarët që mund të preken nga një vendim i mundshëm, por ka insistuar se klubi duhet të mbajë përgjegjësi nëse shkeljet konfirmohen.

Në një diskutim në podcastin “The Overlap”, ish-mesfushori anglez theksoi se lojtarët nuk duhet të penalizohen duke humbur medaljet apo trofetë, por se ndaj klubit duhet të ketë masa që do të shërbenin si paralajmërim për të tjerët.

“Për sa u përket ndjenjave të mia, edhe unë mund të prekesha në njëfarë mënyre. Nuk do të doja që lojtarëve t’u merreshin trofetë apo medaljet, sepse kjo nuk do të ishte e drejtë. Por klubit duhet t’i hiqen titujt. Duhet të jepet një shembull”, deklaroi Gerrard.

Ai gjithashtu ka krahasuar rastin e Manchester Cityt me ndëshkimet e shqiptuara ndaj Evertonit dhe Nottingham Forestit për shkelje të rregullave financiare, duke shprehur shpresën që Premier League të tregojë të njëjtën vendosmëri edhe në këtë çështje.

Çështja ndaj Manchester Cityt mbetet një nga rastet më të mëdha disiplinore në futbollin anglez, ndërsa çdo vendim përfundimtar dhe pasojat e mundshme për klubin varen nga përfundimi i procedurave përkatëse.

Burimi: RTKLive