AC Milani dhe Roma janë dy klubet që përmenden si destinacione të mundshme për 20-vjeçarin, i cili po has në vështirësi për të siguruar minuta të rregullta në skuadrën madrilene.

Endrick ka pasur shumë pak hapësirë këtë sezon, duke luajtur vetëm katër minuta në La Liga. Ai ishte sërish në bankën e rezervistëve në fitoren 1:0 të Real Madridit ndaj Villarrealit, pa u aktivizuar fare.

Mungesa e minutave po ndikon në zhvillimin e tij, veçanërisht duke pasur parasysh pritshmëritë e mëdha që shoqëruan transferimin e tij në kryeqytetin spanjoll. Braziliani konsiderohej një prej talenteve më premtuese të futbollit botëror, por deri më tani nuk ka arritur të sigurojë një rol të rëndësishëm në ekip.

Sipas raportimeve, Milani shihet si një prej destinacioneve më të mundshme për sulmuesin, ndërsa edhe Roma mund të përfshihet në garë, duke shpresuar ta bindë lojtarin që të vazhdojë karrierën në futbollin italian.

Te Real Madridi, konkurrenca për një vend në repartin ofensiv është e madhe. Kylian Mbappe dhe Vinicius Junior janë ndër emrat kryesorë në sulm, çka ia vështirëson Endrickut rrugën drejt formacionit të parë.

Për klubin madrilen, situata paraqet gjithashtu një dilemë, pasi mungesa e vazhdueshme e brazilianit nga fusha mund të ndikojë në vlerën e tij në tregun e transferimeve.

Në moshën 20-vjeçare, Endrick ka nevojë për më shumë minuta për të dëshmuar cilësitë e tij dhe për të vazhduar zhvillimin. Një kalim në Serie A mund t’i ofrojë mundësinë për të rifituar besimin dhe për të pasur një rol më të rëndësishëm.

Megjithatë, deri më tani nuk ka një marrëveshje të konfirmuar dhe mbetet të shihet nëse Real Madridi do të jetë i gatshëm ta lejojë largimin e tij në janar.

Burimi: RTKLive