Një aksident i rëndë trafiku ka ndodhur në Kroaci, ku një autobus me targa serbe është përmbysur në autostradë, duke shkaktuar vdekjen e dy personave dhe plagosjen e rreth 33 të tjerëve.

Sipas mediumit kroat HRT, autobusi, i cili ishte i mbushur me pasagjerë dhe po udhëtonte në drejtim të Zagrebit, ka dalë nga rruga, është përplasur me barrierat anësore të sigurisë dhe më pas është përmbysur.

Komandanti i zjarrfikësve të qarkut të Zagrebit, Dario Kezeric, ka bërë të ditur se gjashtë nga të lënduarit janë në gjendje të rëndë shëndetësore.

Në momentin e aksidentit, në autobus ndodheshin 33 pasagjerë dhe dy shoferë. Sipas informacioneve paraprake, automjeti kishte targa të Serbisë.

Menjëherë pas aksidentit, në vendngjarje kanë dalë ekipet e emergjencës, të cilat kanë ndërhyrë për nxjerrjen dhe transportimin e të lënduarve drejt institucioneve shëndetësore.

Ndërkohë, autoritetet kroate kanë nisur hetimet për të përcaktuar shkaqet dhe rrethanat që çuan në këtë aksident tragjik.

Burimi: Dukagjini