Demokratët në Shtetet e Bashkuara kanë arritur në 240 ulëse në Dhomën e Përfaqësuesve, pas disa fitoreve të tjera të konfirmuara gjatë pasdites së së mërkurës, ndërsa numërimi i votave vazhdon në dhjetëra gara ku ende nuk dihen fituesit.

Sipas projeksioneve të CNN-it, rezultati përbën një sukses të madh për Partinë Demokratike dhe një goditje të fortë politike për presidentin amerikan Donald Trump, në zgjedhjet e mesmandatit, të cilat zakonisht shërbejnë si një matës i mbështetjes publike për presidentin dhe administratën e tij.

Në Senat, demokratët kanë siguruar tashmë 54 ulëse, pasi arritën të fitojnë shtatë vende që më parë mbaheshin nga republikanët. Megjithatë, gara në shtetet e Misisipit dhe Alaskës mbetet e hapur, ndërsa diferencat mes kandidatëve janë shumë të vogla. Përfundimi i numërimit në këto dy shtete mund të marrë disa ditë, madje edhe javë.

Rezultatet e deritanishme u japin demokratëve kontrollin e të dy dhomave të Kongresit amerikan, Dhomës së Përfaqësuesve dhe Senatit. Ky ndryshim do të marrë formë zyrtarisht në janar të vitit 2027, kur anëtarët e rinj të Kongresit të nisin mandatin.

Ndërkohë, brenda Partisë Republikane kanë nisur reagimet dhe përpjekjet për të gjetur përgjegjësit për rezultatin e dobët zgjedhor. Në anën tjetër, demokratët kanë filluar të paraqesin prioritetet e tyre për periudhën kur do të marrin kontrollin e Kongresit.

Fitorja u jep demokratëve mundësinë të pengojnë një pjesë të agjendës së Trumpit, të shtojnë mbikëqyrjen ndaj administratës së tij dhe të nisin hetime parlamentare.

Zgjedhjet e mesmandatit mbahen në mes të mandatit katërvjeçar të presidentit amerikan dhe konsiderohen një test i rëndësishëm për mbështetjen ndaj tij. Këtë herë, rezultati paraqet një goditje të madhe për Trumpin, i cili kishte kërkuar mbështetje për kandidatët republikanë. /Insajderi.org/

Burimi: Insajderi