Demokratët në Shtetet e Bashkuara të Amerikës po përgatiten të prezantojnë një numër të madh projektligjesh për rregullimin e inteligjencës artificiale (IA), pasi të marrin kontrollin e Kongresit në janar të vitit të ardhshëm, raporton Reuters.
Planet e tyre shënojnë një ndryshim të rëndësishëm në qasjen ndaj kësaj teknologjie, krahasuar me Kongresin e udhëhequr nga republikanët, të cilët kryesisht janë përqendruar në nxitjen e zhvillimit të inteligjencës artificiale dhe kanë refuzuar miratimin e kufizimeve ligjore për këtë industri.
Sipas ligjvënësve, ndihmësve të Kongresit dhe përfaqësuesve të organizatave që merren me këtë çështje, demokratët synojnë të hartojnë ligje që mbrojnë konsumatorët nga rritja e kostove të energjisë elektrike, e lidhur me zgjerimin e qendrave të të dhënave, si dhe të kërkojnë testime të pavarura për sistemet e avancuara të inteligjencës artificiale.
Një tjetër objektiv është përcaktimi më i qartë i përgjegjësisë ligjore të kompanive të teknologjisë në rastet kur produktet e tyre të bazuara në inteligjencën artificiale shkaktojnë dëme.
Megjithatë, miratimi i këtyre nismave mund të përballet me pengesa të mëdha përderisa Donald Trump vazhdon të jetë president, pasi ai vazhdimisht ka kundërshtuar vendosjen e rregullave detyruese për zhvillimin e kësaj teknologjie.
Demokratët synojnë që përmes kontrollit të komiteteve parlamentare të avancojnë propozimet e tyre, të thërrasin drejtuesit e kompanive të teknologjisë për dëshmi dhe të rrisin presionin për rregullimin e industrisë.
Senatori Chuck Schumer, i cili pritet të bëhet lider i shumicës në Senat, ka thënë se mbrojtja e konsumatorëve nga rritja e faturave të energjisë elektrike, e shkaktuar nga zgjerimi i qendrave të të dhënave, do të jetë një nga prioritetet e demokratëve gjatë vitit të ardhshëm.
Ndërkaq, përfaqësuesja demokrate nga Massachusetts, Lori Trahan, planifikon të shtyjë përpara një projektligj që do të kërkonte nga ekspertë të pavarur vlerësimin e modeleve kryesore të inteligjencës artificiale, në përputhje me standardet e sigurisë.
Ajo gjithashtu synon të qartësojë përgjegjësinë e kompanive kur sistemet e tyre të inteligjencës artificiale shkaktojnë dëme.
Edhe përfaqësuesja demokrate nga Kalifornia, Zoe Lofgren, e cila synon të drejtojë Komitetin për Shkencë të Dhomës së Përfaqësuesve, ka deklaruar se demokratët do të përqendrohen në krijimin e rregullave të përgjegjshme për inteligjencën artificiale, duke mbështetur njëkohësisht inovacionin.
Ndërkohë, Abdul El-Sayed, demokrati nga Michigan që fitoi një ulëse në Senat në zgjedhjet e së martës, gjatë fushatës kishte propozuar krijimin e një agjencie të pavarur për mbikëqyrjen e inteligjencës artificiale, me kompetenca për të kontrolluar kompanitë që zhvillojnë këtë teknologji.
Sipas një sondazhi të Reuters të publikuar në tetor, shumica e votuesve amerikanë mendojnë se administrata Trump dhe Kongresi nuk po i marrin mjaftueshëm seriozisht rreziqet e inteligjencës artificiale dhe mbështesin miratimin e rregullave të reja për këtë teknologji.
Demokratët planifikojnë gjithashtu të shtojnë mbikëqyrjen ndaj kompanive më të fuqishme të industrisë, përfshirë OpenAI, Anthropic, Meta, Google dhe SpaceX.
Në tetor, Lofgren dhe drejtues të tjerë demokratë të komiteteve të Dhomës së Përfaqësuesve u kërkuan këtyre kompanive të japin informacione për praktikat e tyre të sigurisë dhe të raportojnë rastet kur sistemet e inteligjencës artificiale kanë ndërmarrë veprime të paparashikuara nga zhvilluesit e tyre.
Sipas Reuters, shqetësimet për ndikimin e inteligjencës artificiale janë reflektuar edhe në tregjet financiare.
Aksionet e kompanive të teknologjisë pësuan rënie të ndjeshme të enjten, mes frikës se Kongresi i ri mund të ngadalësojë zhvillimin e kësaj industrie dhe dyshimeve nëse investimet e mëdha në infrastrukturën e inteligjencës artificiale do të sjellin fitimet e pritshme.
Burimi: Dukagjini
