Një 68-vjeçar nga qarku Macomb, në shtetin amerikan të Michiganit, ka shkuar në selinë e Lotarisë së Michiganit për të marrë një dhuratë të vonuar për Krishtlindje: një çmim prej 500 mijë dollarësh, të cilin e kishte fituar pothuajse një vit më parë.

Burri kishte fituar shumën e konsiderueshme përmes një bilete të lotarisë “25 Days of Winning”, të blerë në një pikë shitjeje të kompanisë M & H Petro LLC, në rrugën 15 Mile Road, në Clinton Township.

Ai u tregoi zyrtarëve të lotarisë se çdo vit, me rastin e Krishtlindjeve, ai dhe bashkëshortja e tij blejnë bileta lotarie për të gjithë anëtarët e familjes.

“Çdo vit për Krishtlindje, unë dhe gruaja ime blejmë bileta lotarie për të gjithë familjen. Gjatë festës familjare të Krishtlindjeve vitin e kaluar, djali ynë i shpërndau biletat dhe secili zgjodhi nga një. Pasi të gjithë morën biletat, u ulëm dhe nisëm t’i gërvishtnim”, rrëfeu fituesi.

Surpriza erdhi pak minuta më vonë, kur njëri nga familjarët pyeti nëse dikush kishte fituar ndonjë çmim.

“Thashë se kisha fituar diçka, por mendoja se bëhej fjalë vetëm për 500 dollarë. Një familjar hapi aplikacionin e lotarisë dhe skanoi biletën. Pastaj më shikoi dhe më tha: ‘Uh, ti ke disa zero më shumë se kaq!’ Nuk mund ta besoja kur më treguan se kisha fituar 500 mijë dollarë”, tha ai.

Megjithëse e kishte zbuluar fitoren që gjatë festës së vitit të kaluar, burri e kishte ruajtur biletën fituese dhe vetëm këtë muaj vendosi të paraqitej në selinë e Lotarisë së Michiganit për ta marrë çmimin.

Ai bëri të ditur se paratë e fituara planifikon t’i depozitojë në kursime. /Telegrafi/