Aktiviteti fizik në mbrëmje mund t’i bëjë mirë qarkullimit të gjakut, por një stërvitje tepër intensive, e përfunduar vonë, mund të ndikojë në cilësinë e gjumit

Pas një dite të gjatë pune, mbrëmja është shpesh e vetmja kohë e lirë për aktivitet fizik. Por a ndihmon stërvitja para gjumit që të çlodhemi, apo na mban zgjuar edhe kur ndihemi të lodhur? Studimet tregojnë se ushtrimet në mbrëmje mund të ndikojnë pozitivisht në tensionin e gjakut, ndërsa efekti mbi gjumin varet nga intensiteti dhe ora kur përfundon stërvitja.

Çfarë ndodh me tensionin e gjakut gjatë dhe pas stërvitjes?

Gjatë ecjes së shpejtë, vrapimit, çiklizmit apo notit, zemra pompon më shumë gjak për të furnizuar muskujt me oksigjen. Prandaj tensioni sistolik, vlera e sipërme e matjes, zakonisht rritet gjatë sforcimit. Kjo është përgjigje normale e organizmit.

Pas përfundimit të ushtrimeve, enët e gjakut mbeten të zgjeruara dhe tensioni te shumë persona mund të ulet përkohësisht nën vlerat e regjistruara përpara aktivitetit. Ky fenomen quhet hipotension pas stërvitjes dhe mund të zgjasë disa orë. Aktiviteti i rregullt fizik është, për këtë arsye, pjesë e rëndësishme e kontrollit të hipertensionit, krahas trajtimit të përshkruar nga mjeku.

A është stërvitja në mbrëmje më e mirë për personat me hipertension?

Një përmbledhje shkencore e publikuar në vitin 2026 krahasoi stërvitjen e mëngjesit me atë të mbrëmjes te personat me tension të lartë. Në disa ndërhyrje afatgjata, ushtrimet në mbrëmje ulën më shumë tensionin sistolik te burrat; disa të dhëna te gratë sugjeruan përparësi të mundshme të mëngjesit.

Megjithatë, analiza përfshiu vetëm katër prova klinike dhe rezultatet afatshkurtra nuk ishin të njëtrajtshme. Prandaj nuk mund të thuhet se një orar është më i miri për të gjithë.

Normalisht, tensioni gjatë gjumit bie rreth 10–20 për qind krahasuar me vlerat ditore. Ende nuk është vërtetuar se stërvitja në mbrëmje e përmirëson këtë rënie te çdo person, transmeton Telegrafi.

A mund ta prishë gjumin stërvitja e vonshme?

Aktiviteti fizik zakonisht ndihmon gjumin, por ushtrimet shumë intensive pak para shtratit mund të kenë efekt të kundërt. Sforcimi rrit temperaturën e trupit, pulsin dhe aktivizimin e sistemit nervor; organizmit i duhet kohë të qetësohet.

Një studim në Nature Communications analizoi të dhënat e 14.689 personave fizikisht aktivë, gjatë më shumë se katër milionë netëve. Stërvitjet intensive dhe të vona u shoqëruan me fjetje më të vonshme, gjumë më të shkurtër e cilësi më të dobët, si dhe puls më të lartë gjatë natës.

Kur ushtrimet përfundonin të paktën katër orë para gjumit, këto ndryshime të pafavorshme nuk u vunë re në të njëjtën mënyrë. Megjithatë, studimi ishte vëzhgues: ai tregon lidhje, jo domosdoshmërisht shkak-pasojë.

Çfarë tregojnë studimet më të fundit?

Një analizë e vitit 2026 në Sleep Medicine Reviews përfshiu 25 studime që krahasuan ushtrimet e mëngjesit dhe të mbrëmjes. Nuk u gjetën prova bindëse se stërvitja në mëngjes është përgjithësisht më e mirë për gjumin.

U vu re, megjithatë, se aktiviteti më intensiv në mbrëmje mund të shoqërohet me më shumë zgjime gjatë natës te disa persona. Pra, rëndësi ka jo vetëm ora, por edhe ngarkesa e stërvitjes.

Cilat ushtrime janë të përshtatshme në mbrëmje?

Nëse mbrëmja është koha e vetme për lëvizje, nuk ka arsye të hiqni dorë. Një shëtitje e qetë, ushtrime të lehta shtrirjeje, joga relaksuese ose aktivitet me intensitet mesatar mund të ndihmojnë në çlirimin e tensionit të grumbulluar gjatë ditës.

Vrapimet shumë intensive, stërvitjet me intervale të forta dhe ushtrimet e rënda të forcës është më mirë të përfundojnë disa orë para gjumit, sidomos nëse vëreni se ju pengojnë të flini. Personat me hipertension, sëmundje të zemrës ose terapi që ndikon në puls duhet ta përshtatin intensitetin sipas këshillës mjekësore.

Koha më e mirë për stërvitje është ajo që mund ta ruani

Nëse shëtitja e mbrëmjes ju qetëson dhe pas saj flini mirë, nuk ka arsye ta ndryshoni vetëm sepse dikush rekomandon mëngjesin. Por nëse stërvitja e vonshme ju lë me puls të shpejtë ose ju vonon gjumin, provoni ta bëni më herët ose të ulni intensitetin.

Qëllimi nuk është vetëm të lodhemi, por të ndihmojmë zemrën, enët e gjakut dhe organizmin të funksionojnë më mirë. Gjumi cilësor është pjesë e rëndësishme e këtij rikuperimi.