Kryetari i Aleancës për Ardhmërinë e Kosovës, Ardian Gjini në një konferencë për media ka shpalosur kushtet e AAK-së për Lëvizjen Vetëvendosje, nëse kjo e fundit kërkon ndihmën e AAK-së për formimin e institucioneve.
Gjini para gazetarëve theksoi qëndrimet e AAK-së lidhur me zhvillimet politike. Sipas tij, po krijohet një ndjenjë që Kosova prapë rrezikon me mbet pa institucione për një kohë.
“Gjithçka është peng, gjithçka është blloku pothuajse që një 1 vit e gjysmë”, tha ai.
Gjini tha se AAK nuk synon kurrfarë pjesëmarrje në qeverisjen e Kosovës në qeverinë e ardhshme.
“…Por, i kemi disa kërkesa jetike në mënyrë që Aleanca me kry pjesën e vet të punës në ndihmë në krijimin e institucioneve… E para institucionet e reja duhet qartë, pa ekuivokë me pranu orientimin strategjik, me pranu projektin e gazit amerikan menjëherë”, tha ai.
Sipas tij, ky është projekt strategjik për Kosovën.
Ai po ashtu theksoi se institucionet duhet menjëherë ta ngrisin pragun e TVSH-së nga 30 mijë euro në 100 mijë euro.
“Ka qenë edhe premtim i yni elektoral… Një veprim i tillë kishte me çlirua potencialin e jashtëzakonshëm të ndërmarrjeve të vogla dhe të mesme”, tha ai.
Kryetari i AAK-së më tej theksoi se kërkesë tjetër është që tokat e punuara të lirohen nga tatimi në pronë.
“Kërkojmë që institucionet menjëherë duhet t’i buxhetojnë si të plota ndërtimin e infrastrukturës jetike, siç është rruga për Gjilan, Pejë, Gjakovë, Podujevë, janë të buxhetuara… “, tha ai.
Kryetari i AAK-së po ashtu tha se institucionet duhet të zotohen se për Prishtinën në pesë vjetet e ardhshme do të ndahen 800 milionë deri 1 miliard euro për shkak se sipas tij Prishtina po bëhet e pajetueshme, është ngufatur. /Telegrafi/
