Ushtria amerikane ndërmori sulme të tjera ndaj Iranit të martën, duke nxitur Teheranin ta sulmonte Jordaninë, Bahreinin dhe Kuvajtin, në kundërshtim me paralajmërimin e Presidentit Donald Trump se çdo hakmarrje do të bënte që Irani të “goditej shumë më rëndë”, raporton CNN.
Rundi i fundit i sulmeve reciproke vjen pasi SHBA-ja dhe Irani shkëmbyen sulme gjatë natës së së dielës drejt së hënës për herë të parë pas më shumë se një muaji, në një përplasje që rrezikonte ta rikthente konfliktin shkatërrues pas javësh qetësie relative ushtarake.
Pasi u njoftuan sulmet e reja amerikane, Trump paralajmëroi se Irani do të përballej me veprime ushtarake edhe më të ashpra nëse do të hakmerrej ndaj asaj që ai e quajti “një sulm shumë të justifikuar”.
“Ata do të goditen sërish në një nivel shumë më të rëndë dhe më të lartë, por nuk do të jetë sulmi më i madh nga të gjithë, ai po pret në prapaskenë dhe, kur të përfundojë, do të mbetet shumë pak nga Republika Islamike e Iranit!”, shkroi ai të martën në Truth Social.
Irani, megjithatë, u zotua për një përgjigje “shkatërruese” dhe lëshoi raketa balistike drejt Jordanisë dhe dronë drejt Bahreinit dhe Kuvajtit, duke thënë se kishte në shënjestër asetet ushtarake amerikane.
Teherani pretendoi se copëza nga një prej sulmeve amerikane kishin goditur një festë dasme në jug të vendit, duke vrarë të paktën katër persona, përfshirë një fëmijë të vogël. CNN i është drejtuar Komandës Qendrore të SHBA-së (CENTCOM) për koment lidhur me pretendimin e Iranit.
Sulmet amerikane ishin përgjigje ndaj përpjekjeve të fundit të Iranit për të sulmuar “transportin tregtar në Ngushticën e Hormuzit dhe trupat amerikane të dislokuara në rajon”, tha CENTCOM në një postim në X.
The post Irani hakmerret pas sulmeve amerikane, pasi Trump tha se mund të goditet “shumë më rëndë” appeared first on Gazeta Express.
