Irani ka akuzuar Shtetet e Bashkuara për kryerjen e një “krimi të paramenduar lufte” pas sulmeve ndaj dy rezervuarëve të ujit në zonën Bemani të qytetit Sirik, në jug të vendit.
Zëdhënësi i Ministrisë së Jashtme iraniane, Esmaeil Baghaei, tha se sulmi ka lënë rreth 20 mijë persona pa qasje në ujë të pijshëm.
Në një reagim në rrjetin social X, Baghaei akuzoi Uashingtonin se ka goditur qëllimisht infrastrukturën civile.
“Kjo nuk është dëm anësor. Ky është një krim lufte i llogaritur dhe një shkelje flagrante e të drejtave të njeriut dhe e së drejtës humanitare ndërkombëtare,” deklaroi ai.
Sipas tij, SHBA-ja ka shënjestruar “burimin jetik të popullit iranian” dhe duhet të mbahet përgjegjëse për sulmet ndaj infrastrukturës që siguron jetesën e civilëve.
