Demokracia në Veprim ka mbajtur konferencën e radhës lidhur mbarëvajtjes së procesit zgjedhor.
Eugen Cakolli, nga DnV-ja, bëri të ditur se deri në mesditë procesi i votimit është duke u zhvilluar në mënyrë të qetë dhe pa incidente që do të ndikonin në ecurinë e procesit zgjedhor, njofton Dukagjini.
“Bazuar në gjetjet e raportimit nga vëzhguesit tanë në terren, deri në mesditë, që nga hapja e vendvotimeve, procesi në nivel vendi është duke rrjedhur qetë dhe po karakterizohet nga një respektim i kënaqshëm i rregullave përkatëse, dhe nuk është raportuar për asnjë incident që do të ndikonte në mbarëvajtjen e procesit zgjedhor”, tha Cakolli.
Cakolli, mes tjerash, bëri të ditur se deri në ora 12:00 kanë ndodhur 12 raste të fotografimit të votës në 10 vendvotime teksa u bërë thirrje qytetarëve të mos e bëjnë këtë.
“Deri në ora 12:00 nga ekipet në terren kemi marrë vesh se kanë ndodhur 12 raste të fotografimit të votës në 10 vendvotime. Trendi është i njëjtë si në zgjedhjet e dhjetorit, por ua rikujtojmë qytetarëve se fotografimi i votës përbën raste penale dhe do të ndiqen nga Prokuroria. U bëjmë thirrje qytetarëve që të mos e bëjnë publike votën e tyre”, u shpreh Cakolli.
