Bankat më të mëdha në Britani kanë kryer transaksionet e para ndërbankare duke përdorur depozita të tokenizuara, në një zhvillim të rëndësishëm për përdorimin e teknologjisë blockchain në sistemin bankar.
Lloyds, NatWest dhe Barclays kryen dy transaksione për rifinancimin e hipotekave me depozita të tokenizuara, ndërsa një grup prej tre bankash, përfshirë HSBC, realizoi një pagesë nga klienti te klienti, duke simuluar një blerje në një treg online.
Depozita e tokenizuar është një depozitë normale bankare që regjistrohet në blockchain, në vend të regjistrimit në sistemin e brendshëm të bankës. Ajo ruan të njëjtin status ligjor dhe mbrojtje si paratë që ndodhen në një llogari bankare, por mundëson që transaksionet të kryhen menjëherë dhe të programohen sipas kushteve të caktuara.
Në transaksionet e hipotekave, fondet u transferuan automatikisht ndërmjet bankave pasi u konfirmua transferimi i pronës. Në testin e blerjes online, paratë e blerësit u mbajtën dhe iu transferuan shitësit vetëm pasi u verifikua dorëzimi.
Projekti, i quajtur “Depozita e Madhe Britanike me Tokenizim”, u lançua vitin e kaluar dhe synon të lidhë sistemet e bankave, të cilat deri tani kanë funksionuar të ndara nga njëra-tjetra.
Në projekt marrin pjesë Barclays, HSBC, Lloyds, Monzo, NatWest, Nationwide dhe Santander, me mbështetje edhe nga banka e Anglisë.
Bankat pjesëmarrëse planifikojnë të krijojnë një kompani dhe një rregullore të përbashkët, ndërsa synojnë të emetojnë tre bono digjitale në tremujorin e parë të vitit 2027, të cilat do të tregtohen dhe shlyhen duke përdorur depozita të tokenizuara, shkruan Euronews.
The post Bankat më të mëdha britanike kryejnë transaksionet e para ndërbankare me depozita të tokenizuara appeared first on Gazeta Express.
