Bajrami i reagon Vuçiqit: Kosova nuk negocion ekzistencën e saj
Deklaratat e fundit të presidentit serb, Aleksandar Vuçiq, se Kosova është pjesë e Serbisë, kanë nxitur reagime të ashpra në Kosovë dhe në skenën politike evropiane. Kryenegociatori i Kosovës në dialogun me Serbinë, njëherësh ambasador i Kosovës në Bruksel, Agron Bajrami, ka kritikuar retorikën e Beogradit.
“Beogradi vazhdon të mohojë realitetin, të mohojë të vërtetën dhe të riciklojë gjuhën e viteve 1990. Nuk mund të ketë dialog të besueshëm ndërsa njëra palë ende pretendon territorin e palës tjetër dhe ëndërron për përsëritjen e spastrimit etnik. Kosova nuk do të negociojë ekzistencën e saj”, ka shkruar Bajrami.
Retorikën e Vuçiqit e kanë kritikuar edhe Demokratët Evropianë, pjesë e Partisë Demokratike Evropiane, të cilët e kanë cilësuar atë si të dëmshme për procesin e pajtimit dhe stabilitetin në rajon.
Në reagimin e tyre, Demokratët Evropianë e kanë ndërlidhur deklaratën e presidentit serb edhe me deklaratat e ministres serbe Snezhana Paunoviq, e cila ditë më parë tha se do ta kishte “spastruar etnikisht” Kosovën në vitin 1998.
“Udhëheqja nuk matet vetëm me qëndrimet që mban, por edhe me retorikën që toleron dhe legjitimon”, thuhet në reagim.
Demokratët Evropianë kanë theksuar se e ardhmja evropiane e Ballkanit Perëndimor duhet të ndërtohet mbi dialogun, pajtimin, përgjegjësinë dhe respektimin e së drejtës ndërkombëtare.
Belgrade continues to deny reality, negate truth and recycle the language of the 1990s.
There can be no credible dialogue while one side still claims the other’s territory and daydreams of repeating ethnic cleansing.#Kosova will not negotiate its existence. https://t.co/TffoxQkg36
— Agron Bajrami (@AgronBajrami) July 26, 2026
