Babai i 27-vjeçarit që humbi jetën pas një konflikti fizik në fshatin Kobaj të Prizrenit ndodhet në gjendje të rëndë shëndetësore dhe po merr trajtim mjekësor në spital.
Lajmin e ka konfirmuar kryeprokurori i Prizrenit, Petrit Kryeziu, i cili bëri të ditur se nga ngjarja një person ka humbur jetën, ndërsa një tjetër ka pësuar lëndime të rënda.
“Sipas informacioneve fillestare, një person ka vdekur, ndërsa një tjetër ndodhet në gjendje të rëndë dhe po trajtohet në spital. Dyshohet se viktima ka marrë lëndime nga një mjet i mprehtë. Në vendin e ngjarjes ndodhen hetuesit policorë, ekspertët e forenzikës dhe prokurori i shtetit, të cilët po zhvillojnë veprimet e nevojshme hetimore”, tha Kryeziu.
Sipas informacioneve paraprake, përleshja ka ndodhur mes dy familjeve që janë kushërinj me njëra-tjetrën, ndërsa autoritetet po vazhdojnë hetimet për të zbardhur të gjitha rrethanat e rastit.
