Një 35-vjeçare është arrestuar nga FBI, pasi dyshohet se po planifikonte një sulm me bombë në Kapitolin e Shtetit të Nju Jorkut, me synimin për të vrarë anëtarë të Senatit të shtetit.
Jessica Bowie përballet me akuzën për tentativë për të ofruar mbështetje materiale për ISIS-in, sipas një kallëzimi penal të bërë publik nga autoritetet amerikane.
Sipas hetuesve, Bowie kishte deklaruar besnikërinë ndaj organizatës terroriste ISIS dhe kishte diskutuar mënyra për të fshehur një bombë brenda një çante të përdorur për shpërndarjen e ushqimit. Ajo dyshohet se planifikonte ta kryente sulmin në kohën kur senatorët do të ishin duke zhvilluar një seancë në Kapitol.
Autoritetet thonë se gruaja ishte konvertuar në Islam rreth pesë vite më parë dhe kishte nisur të përdorte emrin “Aisha Saif”.
Sipas dokumenteve të akuzës, më 28 maj 2026, duke përdorur emrin e përdoruesit “nusaybahsaif” në një platformë sociale, Bowie i kishte shkruar një personi tjetër në gjuhën arabe, duke shprehur mesazhe mbështetëse për sulmet e 11 Shtatorit dhe kërcënime ndaj personave që i konsideronte “jobesimtarë”.
Sipas FBI-së, planet e 35-vjeçares nuk kufizoheshin vetëm te një sulm i mundshëm ndaj Kapitolit.
Kreu i zyrës së FBI-së në Albany, Craig Tremaroli, deklaroi se ajo dyshohet se synonte të shkaktonte një destabilizim më të gjerë të institucioneve amerikane.
Autoritetet amerikane pretendojnë gjithashtu se Bowie kishte planifikuar të largohej nga Shtetet e Bashkuara pas sulmit dhe më pas të rikthehej për të kryer sulme të tjera.
The post Arrestohet 35-vjeçarja në Nju Jork, dyshohet se kishte planifikuar sulm me bombë në Kapitol appeared first on Gazeta Express.
