Gjykata Themelore në Prishtinë ia ka caktuar masën e arrestit shtëpiak mjekut S.D. të dyshuar për marrje ryshfeti.
Themelorja refuzoi kërkesën e Prokurorisë për caktimin e paraburgimit për të dyshuarin, ka njoftuar Betimi për Drejtësi.
Prokuroria kërkoi një muaj paraburgim për mjekun, por Gjykata vendosi të caktojë masën e arrestit shtëpiak për një muaj.
Në arsyetimin e aktvendimit, gjyqtarja e procedurës paraprake ka konstatuar se me masën e arrestit shtëpiak mund të arrihet “qëllimi i sigurimit të prezencës së të pandehurit në procedurë dhe zhvillimit me sukses të kësaj procedure penale”.
S.D. dyshohet se në pozitën e mjekut ortoped në QKUK, më 1 shtator pasi kishte operuar pacientin R.M., ka kërkuar ryshfet prej 450 euro nga Xh.P. Pas negocimit Xh.P. është pajtuar ta paguajë shumën prej 300 eurove.
Policia e Kosovës (PK) të hënën ka dhënë detaje për arrestimin e mjekut S.D., në Qendrën Klinike Universitare të Kosovës (QKUK) nën dyshimin për marrje ryshfeti, ku thuhet se janë sekuestruar një shumë e të hollave, një telefon celular dhe disa pajisje mjekësore.
“Është arrestuar i dyshuari mashkull kosovar, pasi që i njëjti dyshohet se ka kryer veprën penale marrje e ryshfetit. Nga i dyshuari në cilësi të provave janë sekuestruar një shume e te hollave, një telefon celular si dhe disa pajisje mjekësore. Me vendim të prokurorit i dyshuari është dërguar në mbajtje”, thuhet në njoftim.
Lidhur me rastin e arrestimit të mjekut, ka reaguar edhe Shërbimi Spitalor Klinik dhe Universitar (ShSKUK), ku thanë se do të ndërmerren të gjitha veprimet ligjore.
