Veprimtarinë e ka të ndaluar që një kohë të gjatë.
E të premten, për këtë objekt afarist, që kishte shërbyer si pompë derivatesh, u dha urdhri që të rrënohet.
Por ky nuk do të jetë objekti i vetëm që do të shembet.
Të njëjtin fat pritet ta kenë edhe disa objekte tjera përgjatë magjistrales Prishtinë – Fushë Kosovë, prona këto të Ministrisë së Bujqësisë.
“Po zbatohet një vendim i gjykatës, procedurë e zbatimit të ligjshmërisë, prona e Ministrisë së Bujqësisë do t’i rikthehet qytetarëve, do të gjelbërohet këtu dhe do i shërbej komunitetit, sepse këto toka kanë qenë të gjitha të institutit bujqësor të Kosovës. Të gjitha këto hapësira, 1.2 hektar që kanë qenë të uzurpuara do të lirohen sot”, thotë ministri në detyrë i Bujqësisë, Armend Muja.
Derisa pronat e Ministrisë shfrytëzohen nga biznese private, vetë institucioni vazhdon të paguajë qira të larta për objektin ku operon aktualisht.
Andaj sipas ministrit Muja, pikërisht kjo është arsyeja pse ka nisur aksioni për lirimin e hapësirave, me synimin që ministria të rikthehet në pronat e veta.
“Ministria e Bujqësisë ka paguar deri tash afërsisht 1 milionë qira, paradoks në vete ky, dmth Ministria e Bujqësisë paguan qira, kurse objektet tona shfrytëzohen nga privati por sidoqoftë i kamë dhënë fund kësaj, unë kam nxjerr vendim që Ministria dhe të gjitha institucionet vartëse të rikthen në objekte publike”, thotë Muja.
Ministri Muja mohoi se ky aksion i lirimit të hapësirave të Ministrisë, të lidhet me fushatën zgjedhore.
“Nuk ka të bëjë me fushatë zgjedhore në fakt pas vendimit ka filluar procedura e prokurimit për kontraktonin, dhe javën e kaluar kanë përfunduar të gjitha proceset e ankimit dhe kontrata është nënshkruar në momentin e parë që kemi marr dritën jeshile nga OSHP-ja”.
Por krejt ky aksion nuk kaloi pa kundërshtime.
Një kamion e një rimorkio, u vendosen tek pompa për ta penguar procesin.
Për këtë, kandidati për deputet i Partisë Demokratike të Kosovës, Qëndrim Kryeziu, përfundoi në polici, për pengim të punës së operatorëve.
