Asociacioni i Komunave të Kosovës (AKK) ka akuzuar Qeverinë për “hakmarrje të drejtpërdrejtë institucionale”, pas largimit, sipas këtij asociacioni, të përfaqësuesit të komunave nga Bordi i Drejtorëve i Fondit të Kosovës për Efiçiencë të Energjisë (FKEE).
Drejtori ekzekutiv i AKK-së, Sazan Ibrahimi, ka thënë se ky veprim nuk mund të konsiderohet si ndryshim teknik, por si pasojë e qëndrimeve publike të Asociacionit dhe mbrojtjes së interesave të komunave, raporton Telegrafi.
“Largimi i përfaqësuesit të Asociacionit të Komunave të Kosovës nga Bordi i Drejtorëve i Fondit të Kosovës për Efiçiencë të Energjisë nuk është ndryshim teknik. Ky është veprim i qëllimshëm dhe hakmarrje e drejtpërdrejtë institucionale ndaj AKK-së, për shkak të qëndrimeve tona publike dhe mbrojtjes së vazhdueshme të interesave të komunave të Kosovës”, ka deklaruar Ibrahimi.
Sipas AKK-së, që nga themelimi i FKEE-së përmes Ligjit për Efiçiencën e Energjisë në vitin 2018, komunat kanë pasur përfaqësuesin e tyre në Bordin e Fondit, i cili është emëruar nga AKK-ja dhe ka pasur të drejtë vote.
Asociacioni pretendon se edhe Grupi Punues për hartimin e Projektligjit të ri kishte vendosur që AKK-ja të vazhdonte të kishte përfaqësuesin e saj në Bordin e FKEE-së, por ky rekomandim, sipas tyre, nuk është përfshirë në versionin përfundimtar të Projektligjit nga Ministria e Ekonomisë.
“Kur Ministria e Ekonomisë e largon në mënyrë të njëanshme AKK-në, pavarësisht vendimit të Grupit Punues dhe një praktike institucionale tetëvjeçare, ky veprim nuk mund të kuptohet ndryshe veçse si ndëshkim për qëndrimet tona”, ka thënë Ibrahimi.
Ai ka pretenduar se qëndrimi i Qeverisë lidhet me kundërshtimin e AKK-së ndaj centralizimit dhe angazhimin e saj për mbrojtjen e autonomisë lokale.
“Mesazhi i Qeverisë është i qartë: për shkak se AKK-ja ka ngritur zërin kundër centralizimit dhe ka mbrojtur fuqishëm autonominë lokale, tani synohet largimi i saj nga mekanizmat institucionalë të vendimmarrjes”, ka deklaruar ai.
Sipas AKK-së, komunat janë nivel i veçantë kushtetues i qeverisjes dhe duhet të kenë përfaqësim të drejtpërdrejtë në organet vendimmarrëse të FKEE-së.
“Komunat janë nivel i veçantë kushtetues i qeverisjes. Ato nuk mund të përfaqësohen nga institucionet e nivelit qendror, por vetëm nga një përfaqësues i mandatuar drejtpërdrejt prej tyre”, thuhet në qëndrimin e AKK-së.
Ibrahimi ka argumentuar se mungesa e përfaqësimit të komunave në Bordin e Fondit do të cenonte partneritetin institucional, veçanërisht duke pasur parasysh rolin e komunave në projektet për efiçiencën e energjisë, shkruan Telegrafi.
“Nëse katër ulëse në Bordin e Fondit u takojnë institucioneve të nivelit qendror, ndërsa komunat mbeten pa asnjë përfaqësues të mandatuar prej tyre, atëherë nuk kemi partneritet institucional. Kemi centralizim dhe kontroll politik të vendimmarrjes”, ka thënë ai.
AKK-ja ka theksuar se komunat janë ndër partnerët dhe përfituesit kryesorë të FKEE-së, pasi në objektet komunale realizohen investime të konsiderueshme në efiçiencën e energjisë, ndërsa komunat marrin përsipër përgjegjësi financiare dhe zbatuese dhe vënë në dispozicion pronën publike komunale.
Në fund, Ibrahimi i ka kërkuar Ministrisë së Ekonomisë që ta rikthejë në Projektligj dispozitën për përfaqësimin e AKK-së në Bordin e Drejtorëve të FKEE-së.
“Kërkoj nga Ministria e Ekonomisë që ta respektojë vendimin e Grupit Punues dhe ta rikthejë në Projektligj dispozitën që garanton një përfaqësues të emëruar nga AKK-ja në Bordin e Drejtorëve të FKEE-së, me të drejtë vote”, ka deklaruar ai.
AKK-ja ka bërë të ditur se do të vazhdojë të kundërshtojë atë që e konsideron përpjekje për përjashtimin e saj nga mekanizmat institucionalë të vendimmarrjes.
“AKK-ja nuk do të heshtë dhe nuk do të zmbrapset përballë përpjekjeve për ta ndëshkuar dhe përjashtuar nga vendimmarrja vetëm sepse mbron interesat e komunave dhe të qytetarëve të Kosovës”, ka përfunduar Ibrahimi. /Telegrafi/
