Nënkryetari i Komunës së Skenderajt, Fadil Nura, ka deklaruar se dy personat e ndaluar nga Policia në lidhje me incidentin e ndodhur në Skenderaj nuk kanë qenë në vendin e ngjarjes në momentin kur ka ndodhur përleshja.
Ai ka shtuar se të ndaluarit janë shoqëruar nga Policia që nga mbrëmja dhe se pret që institucionet e drejtësisë të vlerësojnë arsyet e ndalimit të tyre.
“Në momentin që po flasim dy zyrtarë që nuk kanë qenë në vendin e ngjrjes janë ndaluar në Policia nga dje pasdite. Ekzistojnë edhe dëshmi për këtë çështje.
Nuk kanë qenë në vend të ngjarjes, kanë qenë me mua. Unë kam qenë në fshatin Llaushë, kam dëgjuar për rastin. Dhe janë incizimet e kamerave të komunës, kur jemi ardhur. Por, që në mbrëmje i kanë ndal. Kështu që ata e kanë vlerësuar se pse i kanë ndal…”, ka thënë Nura.
Ndërkohë, Prokuroria Themelore e Mitrovicës ka njoftuar se disa persona të përfshirë në rast nuk i janë përgjigjur ftesës për intervistim, përfshirë edhe kryetarin e Skenderajt, Sami Lushtaku.
Rasti ka ndodhur në një kafiteri në qendër të Skenderajt, ku zëvendësministri Hysni Mehani dhe sekretari i degës së Lëvizja Vetëvendosje, Bahri Zabeli, kanë mbetur të lënduar, ndërsa palët kanë dhënë versione të ndryshme për mënyrën se si ka ndodhur incidenti.
