Deputeti i Lidhjes Demokratike të Kosovës (LDK), Ermal Sadiku, ka ngritur shqetësime lidhur me raportimet për probleme me sigurinë e aplikacionit WhatsApp, duke kërkuar nga institucionet e Kosovës që ta trajtojnë çështjen me urgjencë.
Sadiku, i cili është edhe drejtues i një kompanie të IT-së, ka bërë thirrje që institucionet përgjegjëse të kontaktojnë edhe partnerët ndërkombëtarë dhe kompanitë përkatëse për të verifikuar situatën dhe për të ndërmarrë masa të mundshme.
“Edhe një herë: problemi me WhatsApp-in duket se është më i madh sesa kam menduar edhe unë. Po e lus Qeverinë, Albin Kurtin, Lulëzon Jagxhiun dhe institucionet përgjegjëse: trajtojeni këtë çështje me urgjencë”, ka deklaruar Sadiku.
Ai ka kërkuar që të shqyrtohen edhe masa të përkohshme, përfshirë kufizimin e SMS-ve të dyshimta, nëse një veprim i tillë vlerësohet teknikisht i nevojshëm.
“Ka raportime për sulme dhe tentativa për marrjen e llogarive, të dhënave personale, mesazheve dhe kodeve të verifikimit për banka”, ka thënë ai.
Sadiku ka theksuar se qëllimi nuk është krijimi i panikut, por kërkoi verifikim teknik dhe informim të menjëhershëm të qytetarëve për mënyrat e mbrojtjes.
“Nuk dua të krijoj panik, por kjo nuk duhet të neglizhohet. Duhet reagim institucional, verifikim teknik i asaj që po ndodh dhe njoftim i menjëhershëm i qytetarëve se si të mbrohen”, është shprehur ai.
Ndërkohë, edhe deputeti i Lëvizjes Vetëvendosje, Mefail Bajqinovci, ka ngritur shqetësime lidhur me funksionimin e llogarisë së tij në WhatsApp.
“WhatsApp më është mbyllur apo dihet se çka po ndodh, a ka dikush info?”, ka shkruar Bajqinovci.
Shqetësimi për këtë çështje është ngritur fillimisht në rrjetet sociale nga Darsej Rizaj, bashkëthemelues i “Shkollës Digjitale” dhe “StarLabs”.
Rizaj ka raportuar për probleme që lidhen me llogaritë në WhatsApp, ndërsa më pas ka thënë se një numër i madh biznesesh kanë raportuar probleme të ngjashme.
Ndërkohë, qytetarëve u është bërë thirrje që të mos ndajnë me persona të tjerë kodet e verifikimit që pranojnë përmes SMS-ve dhe të shmangin hapjen e lidhjeve të dyshimta derisa situata të sqarohet teknikisht./Telegrafi/
