Në selinë e Organizatës së Veteranëve të Luftës së UÇK-së është pritur këtë të mërkurë prefekti i Tiranës, Shkëlqim Hajdari.
Gjatë takimit, OVL-UÇK e nderoi Hajdarin me dekoratë mirënjohjeje për, siç u tha, kontributin e tij ndaj çështjes kombëtare dhe mbështetjen për veteranët e luftës.
Kryetari i OVL-UÇK-së, Hysni Gucati, deklaroi se nuk beson që ish-krerët e UÇK-së do të dënohen nga Gjykata Speciale, duke shtuar se një vendim i tillë mund të sjellë tensione dhe destabilizim në Kosovë dhe në Ballkan.
Sipas Gucatit, ndaj ish-udhëheqësve të UÇK-së nuk ekziston bazë materiale për dënim, ndërsa përgjegjësinë për krimet gjatë luftës ai ia atribuoi forcave serbe.
“Reagimet qytetare në rast të një vendimi dënues mund të përfshijnë protesta dhe demonstrata, por theksoi se deklaratat e tij nuk duhet të interpretohen si kërcënim”, ka thënë Gucati.
Në anën tjetër, prefekti i Tiranës, Shkëlqim Hajdari, deklaroi se ish-krerët e UÇK-së po mbahen padrejtësisht në Hagë dhe se, sipas tij, Prokuroria Speciale nuk ka prova bindëse për akuzat e ngritura ndaj tyre.
Hajdari tha se qëndrimi i ish-udhëheqësve të UÇK-së para drejtësisë ka dëshmuar, sipas tij, mungesën e provave dhe ka forcuar bindjen për pafajësinë e tyre.
“Dëshmitarët e paraqitur nga mbrojtja kanë qenë figura me kredibilitet të lartë ndërkombëtar, përfshirë ish-zyrtarë amerikanë dhe përfaqësues të institucioneve ligjzbatuese”, ka thënë Hajdari.
Gjatë fjalës së tij, Hajdari u bëri thirrje institucioneve të Kosovës që të kenë më shumë përkujdesje për veteranët e luftës, duke theksuar nevojën për mbështetje shëndetësore dhe sociale për ta.
The post Gucati: Dënimi i ish-krerëve mund ta destabilizojë Ballkanin appeared first on Gazeta Express.
