Presidenti i Malit të Zi, Jakov Milatoviq, në fjalimin e tij para Asamblesë së Përgjithshme të Kombeve të Bashkuara, iu referua edhe Serbisë dhe glorifikimit të kriminelëve të luftës në Ballkanin Perëndimor, pas organizimit të ceremonisë së varrimit për kriminelin e dënuar të luftës, Ratko Mlladiq.
Milatoviq tha se pajtimi i qëndrueshëm në rajon nuk mund të ndërtohet mbi mohimin, drejtësinë selektive apo lavdërimin e personave të dënuar për krime lufte.
“Pajtimi i qëndrueshëm nuk mund të bazohet në mohimin, qasjen selektive ndaj drejtësisë apo glorifikimin e të dënuarve për krime lufte. Ai kërkon respektimin e vendimeve të gjykatave ndërkombëtare dhe dinjitet të barabartë për çdo viktimë, pavarësisht identitetit apo prejardhjes së saj”, tha presidenti malazez.
Duke folur para liderëve botërorë, Milatoviq theksoi se bota, tetë dekada pas themelimit të OKB-së, vazhdon të përballet me luftëra dhe konflikte.
Ai foli edhe për integrimin evropian të Malit të Zi, duke thënë se Bashkimi Evropian për vendin e tij nuk është vetëm një destinacion, por edhe një rrugë e bazuar në vlera të përbashkëta.
Milatoviq përsëriti synimin që Mali i Zi të bëhet anëtar i BE-së deri në vitin 2028, ndërsa tha se të ardhmen e të gjithë Ballkanit Perëndimor e sheh në kuadër të familjes evropiane.
“Brezi ynë ka përgjegjësinë ta përfundojë rrugën evropiane të Malit të Zi deri në vitin 2028 dhe të tregojë se Ballkani mund t’i lërë pas ndarjet e vjetra, ndërsa brezave që vijnë t’u lërë më shumë mundësi sesa kishim ne”, deklaroi ai.
Në pjesën e fjalimit kushtuar Lindjes së Mesme, presidenti malazez tha se përgjegjësia e komunitetit ndërkombëtar në Gaza fillon me mbrojtjen e jetëve njerëzore dhe sigurimin e dërgimit të papenguar të ndihmës humanitare.
Ai theksoi se izraelitët meritojnë siguri të qëndrueshme, ndërsa palestinezët kanë të drejtë për dinjitet, liri dhe një shtet të qëndrueshëm.
“Mali i Zi mbështet zgjidhjen me dy shtete, në të cilën Izraeli dhe Palestina e pavarur dhe e qëndrueshme do të jetonin krah për krah në paqe dhe siguri, me njohje të ndërsjellë”, tha Milatoviq.
Ai shtoi se çarmatimi i Hamasit mbetet një element i rëndësishëm i një marrëveshjeje të qëndrueshme dhe se i gjithë procesi duhet të bazohet në respektimin e të drejtës ndërkombëtare humanitare.
Në fund, Milatoviq paralajmëroi se ndaj dinjitetit njerëzor dhe zbatimit të së drejtës ndërkombëtare nuk mund të aplikohen standarde të dyfishta, pavarësisht rrënjëve historike të konflikteve.
The post Milatoviq i drejtohet Serbisë në OKB: Pajtimi nuk ndërtohet duke lavdëruar kriminelët e luftës appeared first on Gazeta Express.
