Hulumtuesi i lartë në Institutin Demokratik të Kosovës (KDI), Eugen Cakolli, ka shkruar për ndikimin që ka pasur në Kosovë aktgjykimi i fundit në Hagë ndaj ish-krerëve të Ushtrisë Çlirimtare të Kosovës.
Një javë pas aktgjykimit, Cakolli ka ngritur pyetjen se si do të dukej jeta në Kosovë sot, sikur para gati tri dekadash njerëzit që themeluan UÇK-në të kishin zgjedhur rrugën më të sigurt për veten dhe familjet e tyre.
“A thua, si do të dukej jeta jonë sot sikur, para gati tridhjetë vjetësh, njerëzit që e themeluan UÇK-në ta kishin zgjedhë secili rrugën më të sigurt për veten dhe familjet e tyre?”, ka shkruar Cakolli.
Ai ka përmendur mundësinë që disa prej tyre të kishin vazhduar fakultetin, të tjerë të kishin mbajtur vendet e punës, ndërsa disa të ishin larguar jashtë vendit, duke pritur që çështja e Kosovës të zgjidhej në mënyrë tjetër.
Sipas tij, në atë rast pyetja sot nuk do të ishte vetëm se çfarë do të shkruhej në librat e historisë, por se në cilin shtet do të jetonin qytetarët e Kosovës, në çfarë gjuhe do të mësonin fëmijët dhe çfarë institucionesh do të kishin.
“Sepse liria, kur zgjat mjaftueshëm, fillon me të u dukë si gjendje natyrore. Harrohet sa e largët ka qenë veç një gjeneratë më herët”, ka shkruar ai.
Cakolli ka thënë se aktgjykimi i fundit në Hagë, përtej debatit për dënimet, drejtësinë dhe politikën, ka rikthyer në vëmendje pyetjen se çfarë ka përfaqësuar UÇK-ja për shoqërinë kosovare.
“Një aktgjykim që, sipas mënyrës se si u lexua, tentoi me i goditë ata që e krijuan dhe udhëhoqën UÇK-në, në mënyrë paradoksale, prodhoi një efekt krejt tjetër në Kosovë”, ka shkruar Cakolli.
Ai ka vërejtur se ditët e fundit emblema e UÇK-së është parë më shpesh në bluza, kapela dhe vetura, ndërsa këngët patriotike janë dëgjuar në hapësira publike.
Sipas tij, kjo tregon se për shumë njerëz, veçanërisht për një pjesë të rinisë, UÇK-ja nuk shihet vetëm si një kapitull i së kaluarës, por lidhet me lirinë që gëzohet sot.
Cakolli ka shkruar se për më shumë se 20 vjet debati publik për UÇK-në është zhvilluar kryesisht përmes zhvillimeve pasluftës, partive politike, pushtetit, akuzave dhe proceseve gjyqësore.
“Këto ditë po ndodh e kundërta. Përtej fatit individual të Hashim Thaçit, Kadri Veselit, Jakup Krasniqit dhe Rexhep Selimit, shumë njerëz po kthehen te vetë ideja fillestare që ata dhe shumë të tjerë përfaqësuan atëherë”, ka shkruar ai.
Në fund, Cakolli ka thënë se mënyra se si qytetarët po reagojnë një javë pas aktgjykimit tregon se UÇK-ja vazhdon të ketë një peshë të veçantë në shoqërinë kosovare.
“Para se të jetë e kujtdo, UÇK-ja, duke na e bërë dritë lirinë që e gëzojmë sot, është e të gjithëve”, ka përfunduar Cakolli.
