Tërheqja e mundshme e kërkesës së Partisë Demokratike të Kosovës nga Gjykata Kushtetuese, për kushtetutshmërinë e konstituimit të Kuvendit dhe formimin e Qeverisë së re, nuk do të thotë domosdoshmërisht se rasti përfundon.
Hulumtuesi në Institutin Demokratik të Kosovës (KDI), Vullnet Bugaqku, ka deklaruar për KosovaPress se Gjykata Kushtetuese mund ta vazhdojë shqyrtimin e një rasti edhe nëse pala që e ka parashtruar kërkesën vendos të tërhiqet.
Deklarata vjen pasi PDK-ja ka bërë të ditur se është e gatshme t’i tërheqë lëndët nga Kushtetuesja nëse Lëvizja Vetëvendosje zotohet publikisht se do ta mbështesë projektligjin për ndryshimin dhe plotësimin e Ligjit për Dhomat e Specializuara, pas dënimit të ish krerëve të UÇK-së, raporton KosovaPress.
“Tërheqja e kërkesës nuk ndalon Gjykatën Kushtetuese që të marrë vendimin për rastin që është parashtruar tashmë. Gjykata Kushtetuese, sipas ligjit dhe Rregullores së Punës, e ka një dispozitë që thotë që, pavarësisht nëse pala tërhiqet nga parashtrimi ose pas parashtrimit të kërkesës, gjyqtarët e Gjykatës e kanë të drejtën ta vazhdojnë rastin deri në fund. Besoj se ata e kanë mundësinë që ta trajtojnë situatën e konstituimit të Kuvendit në formën që ndodhi para ca javësh”, deklaroi ai.
Ndërkaq, avokati Ardian Bajraktari ka vlerësuar se çështjet që lidhen me konstituimin e Kuvendit dhe respektimin e afateve kushtetuese janë me interes publik dhe duhet të sqarohen nga Gjykata Kushtetuese.
Sipas tij, edhe nëse ka tërheqje të kërkesës nga iniciuesit, është e domosdoshme të ketë interpretim për pasojën juridike të tejkalimit të afatit për konstituimin e Kuvendit dhe konstituimin e Kuvendit pa njërin prej nënkryetarëve.
“Çështjet janë jashtëzakonisht të rëndësishme për të ditur a kemi Kuvend të konstituar, në mungesë aktualisht të njërës prej nënkryetarëve. Mirëpo, mbi të gjitha, në radhë të parë, çështja e respektimit të afateve, siç parashihet në aktgjykimet e fundit të Gjykatës Kushtetuese, duke interpretuar nenin 66, paragrafin 1 të Kushtetutës. Prandaj vlerësoj që, megjithatë, i mbetet Gjykatës Kushtetuese të vlerësojë çështjen e interesit publik. Mendoj se këto janë me interes dhe Gjykata Kushtetuese duhet t’i sqarojë këto rrethana, në mënyrë që të ardhmen të mos vijmë në situata të ballafaqimit”, tha Bajraktari.
Partia Demokratike e Kosovës më 14 dhe 15 shtator ka dorëzuar dy kërkesa në Gjykatën Kushtetuese, ku kontestoi kushtetutshmërinë e konstituimit të Kuvendit dhe formimin e Qeverisë së re.
Përkitazi me këtë, Kushtetuesja ka pranuar komentet e palëve të përfshira në këtë çështje. Në këtë institucion kanë thënë për KosovaPress se, brenda afatit të përcaktuar, komentet janë dorëzuar nga ushtruesja e detyrës së presidentes, Albulena Haxhiu, në cilësinë e kryetares së Kuvendit, Grupi Parlamentar i Lëvizjes VETËVENDOSJE!, Grupi Parlamentar i Lidhjes Demokratike të Kosovës, deputeti i Aleancës, Burim Ramadani, dhe Grupi Parlamentar Multietnik./KP/
