Kryetari i PDK’së, Bedri Hamza, tha se do ta dërgojnë në Gjykatë Kushtetuese rastin e moskonstituimit të Kuvendit.
“Do ta dërgojmë rastin në Gjykatës Kushtetuese, brenda afateve ligjore”.
Hamza këtë deklaratë e bëri në një konferencë për media pasi partia e tij lëshoi sallën meqë Lëvizja Vetëvendosje nuk i dha vota Vlora Çitakut për nënkryetare të Kuvendit.
“PDK ishte prezent në Kuvend me qëllim që Kuvendi të konstituohet, që vendi të ketë institucione, mirëpo partia shumicë, Lëvizja Vetëvendosje, Albin Kurti, nuk e ka ndërmend vendit t’i japë institucione. Vazhdon me veprimet e tyre të papërgjegjshme, joinstitucionale, joshtetërore, jo në dobi të qytetarëve të Kosovës të prodhojë drama, kriza, me shpikë situatë të panjohura me qëllim që të vazhdojë me bllokada. Prej sot Partia Demokratike e Kosovës nuk ka asnjë arsye me marrë pjesë në punimet e Kuvendit të Kosovës dhe ne do ta referojmë, do ta dërgojmë lëndën në Gjykatën Kushtetuese. Jemi të sigurt që afatet kanë përfunduar më 7 gusht”, tha Hamza.
Hamza tha se Vetëvendosje edhe sot nuk e respektoi aktgjykimin e Gjykatës Kushtetuese për mënyrën e votimit.
“Aty thotë se duhet të ketë konsensus. Nuk ka konsensus. Me qëllim të konstituimit të Kuvendit, e votuam të propozuarin e Lëvizjes Vetëvendosje, ndërsa ata nuk e votuan të propozuarën e PDK’së dhe në këtë mënyrë e pamundësuan konstituimin e Kuvendit dhe formimin e institucioneve”.
“Me këtë vendi është futur në një situatë të panjohur deri më tani me shumë të panjohura. Kush po dëmtohet? Interesi i vendit. Këtyre s’po iu bëhet vonë që inflacioni ka mbërritur 7.3%, nuk po iu bëjnë përshtypje rezultatet PISA, ikjet e njerëzve nga vend, mosrespektimi i Kushtetutës”.
Çitaku dështoi të zgjidhej nënkryetare pasi nuk mori votat e nevojshme për shkak që Vetëvendosje votoi kundër. Pro saj votoi PDK dhe LDK.
Ndërkaq, nënkryetari i propozuar nga Vetëvendosje, Ardian Gola, mori votat pro edhe të PDK’së edhe të LDK’së./Express/
The post Hamza: Do ta dërgojmë rastin në Gjykatë Kushtetuese appeared first on Gazeta Express.
