Kryeministrja italiane, Giorgia Meloni, ka reaguar pasi qeveria e drejtuar prej saj ka shënuar një rekord historik, duke u bërë kabineti me jetëgjatësinë më të madhe në historinë e Republikës së Italisë.
Meloni e ka cilësuar këtë arritje si një përgjegjësi të madhe dhe jo si një rekord për t’u krenuar. Sipas saj, stabiliteti qeverisës është i rëndësishëm sepse i jep një vendi mundësinë të planifikojë, të marrë vendime dhe të përmbushë angazhimet e tij.
Gjatë reagimit të saj, kryeministrja renditi disa prej prioriteteve dhe rezultateve të qeverisë në këto vite, duke përmendur rritjen e punësimit, uljen e papunësisë, mbështetjen për familjet dhe bizneset, forcimin e sigurisë dhe menaxhimin e financave publike. Ajo theksoi gjithashtu se Italia ka rikthyer, sipas saj, peshën dhe besueshmërinë në arenën ndërkombëtare.
Megjithatë, Meloni nënvizoi se ky rekord nuk është meritë e një personi të vetëm. Ajo ia atribuoi jetëgjatësinë e qeverisë bashkëpunimit brenda koalicionit të qendrës së djathtë, i cili, sipas saj, ka ruajtur unitetin rreth një vizioni të përbashkët për vendin.
Kryeministrja tha gjithashtu se besimi i marrë nga italianët në zgjedhjet e vitit 2022 nuk është konsideruar asnjëherë si një “çek i bardhë”. Ajo paralajmëroi se vitin e ardhshëm qytetarët do të kenë sërish mundësinë të vlerësojnë punën e qeverisë dhe të vendosin nëse ajo duhet të vazhdojë të drejtojë vendin.
Meloni ka arritur sot në 1413 ditë në krye të qeverisë italiane, një ditë më shumë se Silvio Berlusconi, i cili ka drejtuar vendin në katër mandate. Ajo është gjithashtu gruaja e parë që mban postin e kryeministres në historinë e Italisë.
Në përfundim të mesazhit të saj, Meloni u shpreh se puna e qeverisë vijon dhe se objektivi mbetet e ardhmja e vendit: “Me këmbët në tokë dhe me vështrimin e drejtuar nga e ardhmja.”
The post Qeveria më e gjatë e pasluftës plot 1413 ditë, vjen reagimi i parë i Giorgia Melonit appeared first on Gazeta Express.
