Profesori i drejtësisë, Kadri Kryeziu, ka komentuar në emisionin “Info Nata” në Tëvë1 situatën e krijuar rreth procesit të zgjedhjes së presidentit, pas kundërshtimit të gjashtë deputetëve të LDK-së për votimin e Bekim Sejdiut.
Kryeziu ka deklaruar se, sipas tij, marrëveshja ndërmjet Lëvizjes Vetëvendosje dhe LDK-së për Bekim Sejdiun tashmë është e përfunduar, pasi nuk ka vota të mjaftueshme për zgjedhjen e tij.
“Unë mendoj që është e përfunduar kjo marrëveshja për Bekim Sejdiun ndërmjet LVV-së dhe LDK-së, pasi që nuk ka vota. Kështu që, kjo është e përfunduar. Më vjen keq për Bekimin”, ka thënë Kryeziu.
Profesori i drejtësisë ka kritikuar gjithashtu mënyrën se si partitë politike po e menaxhojnë situatën, duke theksuar se në raste të tilla duhet të ketë seriozitet dhe bashkëpunim institucional.
“Ne, elita intelektuale, e kemi për detyrë që të gjejmë zgjidhje dhe duhet t’u ndihmojmë akterëve politikë për të bërë zgjidhje, sepse jemi në një situatë të pazgjidhur. Popullin e kemi të mirë, organet e shtetit, ushtrinë, policinë, AKI-në etj., por partitë nuk i kemi në rregull. Nuk janë në rregull, nuk veprohet kështu. Janë jo serioze, do të thotë parti të cilave nuk u besohet se çka me bisedu. Edhe këto çështje duhet të jenë serioze dhe nuk bëhet hajgare me shtet”, është shprehur ai.
Kryeziu ka folur edhe për rolin dhe profilin që, sipas tij, duhet ta ketë presidenti i vendit.
“Një president duhet të jetë një intelektual dhe çdo president, kur ta merr detyrën, ka kompetenca”, ka deklaruar Kryeziu.
Ndërsa, duke folur për LDK-në dhe udhëheqjen e saj, profesori ka qenë i ashpër në kritikat e tij.
“LDK-ja absolutisht nuk është serioze, sepse si mundet me shku një parti me lidhë një marrëveshje pa u marrë vesh brenda me deputetët që janë faktori kryesor për zgjedhjen e presidentit? Dhe unë, sa e di, Lumir Abdixhiku është profesor dhe ai duhet të jetë dorëheqës menjëherë, me e lëshu partinë. Nuk bëhet kështu. Partia duhet të ketë lidership, sepse nuk shkohet kështu. Duhet t’i bindësh ata deputetë që janë brenda dhe ata është dashur t’i pyesë”, ka thënë Kryeziu.
Deklaratat e tij vijnë në një kohë kur procesi për zgjedhjen e presidentit është përballur me kundërshtime brenda LDK-së, duke e vështirësuar sigurimin e votave të nevojshme për kandidatin e propozuar.
