Komandanti i Njësisë së Specializuar Shumëkombëshe (MSU) të KFOR-it, koloneli Gianfranco Di Fiore, ka vizituar personelin e njësisë që vepron në Mitrovicë, ku është njohur nga afër me punën dhe gatishmërinë e tyre në kuadër të misionit të KFOR-it.
Gjatë vizitës, Di Fiore ka vlerësuar profesionalizmin dhe përkushtimin e pjesëtarëve të MSU-së në ruajtjen e sigurisë dhe në sigurimin e pranisë së KFOR-it në terren.
“Si Komandant i MSU-së, jam jashtëzakonisht krenar për profesionalizmin, disiplinën dhe përkushtimin që shoh nga personeli ynë çdo ditë. Ata e kuptojnë përgjegjësinë që u është besuar dhe jam i bindur në gatishmërinë dhe aftësinë e tyre për të mbështetur misionin e KFOR-it”, ka thënë Di Fiore.
Sipas KFOR-it, Njësia e Specializuar Shumëkombëshe luan rol të rëndësishëm në aftësinë e misionit për të qëndruar i pranishëm, i lëvizshëm dhe i gatshëm për t’iu përgjigjur zhvillimeve të sigurisë në Kosovë.
Personeli i kësaj njësie kontribuon në ndërgjegjësimin për situatën dhe në praninë e dukshme të KFOR-it, ndërsa mbetet i gatshëm për të mbështetur misionin në çdo pjesë të Kosovës, kurdo që të jetë e nevojshme.
KFOR-i ka theksuar se, pavarësisht optimizimit të qëndrimit të tij në Kosovë, përgjegjësia e misionit mbetet e pandryshuar.
Gjatë vizitës në Mitrovicë, komandanti i MSU-së është takuar edhe me pjesëtarë të Ekipit Ndërlidhës dhe Monitorues (LMT) K2 të KFOR-it, të udhëhequr nga NATO.
Në takim, Di Fiore ka vlerësuar angazhimin e tyre në ruajtjen e dialogut dhe kontakteve me përfaqësuesit e të gjitha komuniteteve në terren.
