Një person ka humbur jetën dhe dy të tjerë janë lënduar në një aksident trafiku mes një veture dhe një kamioni, të mërkurën mbrëma në autostradën në drejtim të Vërmicës.
Aksidenti ka ndodhur rreth orës 20:30.
Zëdhënësi i Policisë së Kosovës, Bajram Krasniqi, ka konfirmuar për Dukagjinin se ekipet mjekësore kanë dalë në vendin e ngjarjes.
Sipas tij, mjekët kanë konstatuar se një person nuk kishte shenja jete, ndërsa dy të lënduarit janë dërguar për trajtim mjekësor.
“Në aksident janë përfshirë dy automjete, një kamion dhe një veturë. Në vendin e ngjarjes, përveç njësive policore, janë thirrur edhe ekipet mjekësore. Si pasojë e aksidentit, sipas ekipit mjekësor, një person është pa shenja jete, kurse dy të tjerë kanë pësuar lëndime dhe janë bartur për trajtim mjekësor”, ka thënë Krasniqi.
