Influencuesi kontrovers Andrew Tate e paraqet veten si “jashtëzakonisht të pasur”, por nuk i zotëronte makinat dhe një jaht të paraqitura në rrjetet e tij sociale dhe e ekzagjeronte stilin e tij të jetesës për të tërhequr vëmendje në internet, kanë thënë përfaqësuesit e tij ligjorë, shkruan BBC.
Tate dhe vëllai i tij, Tristan, aktualisht po mbahen në një burg në Florida, por po kërkojnë lirimin me kusht ndërsa presin përfundimin e procedurave të ekstradimit.
Ata u arrestuan muajin e kaluar pasi prokurorët britanikë ngritën akuza të reja, përfshirë vepra të dyshuara seksuale ndaj tyre, të cilat të dy burrat i mohojnë.
Prokurorët kanë argumentuar se vëllezërit Tate janë “rrezik për arratisje”, duke iu referuar deklaratave të mëparshme të vëllezërve për pasurinë dhe ndikimin e tyre, si dhe faktit se kanë përdorur identitete të shumta për t’iu shmangur ligjit.
Në një parashtresë ligjore drejtuar gjykatës, përfaqësuesit ligjorë të vëllezërve thanë se modeli i biznesit të Tate-ve “varet nga vëmendja në internet”.
“Qëllimi është ekzagjerimi i postimeve të tyre dhe i atyre që bëhen për ta. Sa më hiperbolik dhe i jashtëzakonshëm të jetë postimi, aq më shumë gjasa ka të gjenerojë shikime dhe pëlqime, të cilat nga ana tjetër gjenerojnë të ardhura. Me pak fjalë, ata po e luajnë një rol”, thuhet në parashtresë.
Në disa raste, Andrew Tate gjithashtu ka ekzagjeruar dhe ka përdorur hiperbolën për “efekt komik”, pa pasur qëllim që të merrej seriozisht, argumenton parashtresa.
“Qeveria pretendon se Tate-t paraqesin rrezik arratisjeje bazuar në pretendimet e tyre në rrjetet sociale se janë ‘miliarderë të vetëshpallur’, të cilët zotërojnë ‘automjete luksoze, avionë privatë dhe një superjaht të personalizuar me vlerë 50 milionë dollarë, si dhe kanë qasje të pakufizuar në fonde tradicionale, kriptomonedha dhe bitcoin’”, thuhet në të.
“Por qeveria nuk ka vërtetuar se këto pretendime madhështore janë të vërteta”, shtohet më tej.
Prokurorët argumentuan se të dy vëllezërit “kanë burime të konsiderueshme në dispozicion, si në aspektin e parave, ashtu edhe të rrjeteve në mediat sociale”, duke shtuar se ata kanë treguar gjithashtu “prirje për të frikësuar ankuesit vulnerabël”.
Prokurorët iu referuan gjithashtu postimeve në rrjetet sociale të bëra nga Andrew Tate, në të cilat ai dyshohet se është tallur me prokurorët dhe ka sugjeruar se mund ta fshihte identitetin e tij për t’iu shmangur arrestimit.
Superjahti për të cilin bëhet fjalë nuk është në pronësi të Tate-ve dhe atyre iu pagua për ta promovuar atë, thuhet në parashtresë.
Makinat, përfshirë një Aston Martin dhe Bugatti-t që shfaqeshin në përmbajtjet e tyre në rrjetet sociale, ishin marrë me qira, thuhet në të.
“Tate-t janë të përfshirë në disa biznese që ‘u mësojnë’ burrave se si të fitojnë para. Është në interesin e tyre që në rrjetet sociale të paraqiten si jashtëzakonisht të pasur”, shtohet në parashtresë.
Marshals-ët amerikanë i arrestuan vëllezërit në Miami muajin e kaluar, pasi Shërbimi i Prokurorisë së Kurorës në Mbretërinë e Bashkuar ngriti 38 akuza të reja ndaj tyre, përfshirë përdhunim dhe vepra të lidhura me trafikimin seksual.
Tani ata përballen me gjithsej 59 akuza lidhur me vepra të dyshuara të kryera ndërmjet korrikut 2010 dhe gushtit 2017.
Andrew, 39 vjeç, dhe Tristan, 38 vjeç, janë të dy shtetas të dyfishtë britaniko-amerikanë dhe më parë kanë mohuar çdo keqbërje.
Tate, i vetëshpallur “mizogjin”, u bë fillimisht i famshëm pas një paraqitjeje në versionin britanik të emisionit televiziv të realitetit Big Brother në vitin 2016.
Ish-kickboksier, ai ka miliona ndjekës në rrjetet sociale dhe është shfaqur në video të panumërta duke ekspozuar atë që duket si një stil jetese tejet luksoz.
The post Andrew Tate ekzagjeron, nuk i zotëronte supermakinat në fotografi, thonë avokatët e tij appeared first on Gazeta Express.
